‘આજની વાર્તા’ રૂપે રોજ સવારે લાખો લોકોને મોબાઈલ પર વોટ્સએપના માધ્યમે ટૂંકી, રસપ્રદ અને બોધપ્રદ વાર્તાઓ પીરસી દેશ-પરદેશના ગુજરાતીઓમાં આગવી ઓળખ ઊભી કરનાર શ્રી શૈલેષ સગપરિયા ગુજરાત સરકારના સિનિયર ક્લાસ 1 અધિકારી તરીકે સેવાઓ આપી ચૂક્યા છે. યુવાનોના માર્ગદર્શક શૈલેષ સગપરિયાએ સ્પર્ધાત્મક પરીક્ષાની તૈયારી કરતા વિદ્યાર્થીઓને નાત-જાતના ભેદભાવ વગર નિ:સ્વાર્થ ભાવે માર્ગદર્શન અને પ્રેરણા આપીને અનેકને સરકારી નોકરી અપાવવામાં મદદરૂપ બન્યા છે.
તેઓએ બી.કોમ.ની પદવી ગોલ્ડમેડલ સાથે મેળવી. એમ.કોમ. બાદ તેઓ GPSC દ્વારા અધિકારી માટે લેવાયેલી ક્લાસ 1ની પરીક્ષામાં સમગ્ર ગુજરાતમાં ત્રીજા ક્રમે આવ્યા હતા. જુદા જુદા વિષયો પર તેમનાં ૩૩ પુસ્તકો પ્રગટ થઇ ચૂક્યાં છે. એમના લખાયેલા પુસ્તકને ગુજરાત સાહિત્ય અકાદમી દ્વારા પુરસ્કૃત પણ કરવામાં આવ્યું છે. તેમના મોટાભાગના પુસ્તકો બેસ્ટસેલર થયા છે અને બધાની મળી લાખો નકલો વેચાઇ ચૂકી છે. શૈલેષ સગપરિયા એક કુશળ વક્તા પણ છે. શાળાઓ, કોલેજો, વિવિધ સંસ્થાઓ તેમજ ઔદ્યોગિક ગૃહોમાં તેમનાં વ્યાખ્યાનો અને સેમિનારો યોજાતાં રહે છે.