ضعیف و موضوع روایات اور واقعات قسط: 10 تحریر ✍️____سید نادر حسین نقوی البخاری واعظین منبر امام حسین علیہ السلام پر غلو بیان کرنے کے اس قدر عادی ہو چکے ہیں کہ کبھی علی ع خالق کے نعرے لگاتے ہیں تو کبھی علی ع رازق اور رب کے نعرے لگا رہے ہوتے ہیں اسی طرح بعض مصنفین نے بھی اپنی اعتقادی کتابوں میں ائمه معصومین علیہم السلام کو رب ثابت کرنے کی کوشش کی ہے مثلاً علامه حسنین سابقی صاحب نے اپنی کتاب جواہر الاسرار فی مناقب الائمہ الاطہار صفحہ 238 پر ایک باب کا عنوان دیا ہے کہ "ائمه اطہار علیھم السلام کے لئے لفظ رب کا اطلاق" الله تعالیٰ کے علاؤہ مخلوقات میں کوئی بھی رب الارض و السماء یعنی زمین و آسمان کا رب نہیں ہے الله تعالیٰ کے علاؤہ کسی کو بھی رب الارض و السماء کہنا شرک ہے قرآن مجید کی سورۃ الانعام آیت 164 میں ارشاد قدرت ہوتا ہے ؛ قُلْ اَغَيْـرَ اللّـٰهِ اَبْغِىْ رَبًّا وَّهُوَ رَبُّ كُلِّ شَىْءٍ ترجمہ: "کہہ دو کہ کیا اب میں اللہ کے سوا اور کوئی رب تلاش کروں حالانکہ وہی ہر چیز کا رب ہے". اس آیت میں الله تعالیٰ اپنے رسول ص سے فرماتا ہے کہ وہ لوگوں سے کہیں کہ کیا تم لوگ مجھ سے یہی چاہتے ہو کہ میں الله تعالیٰ کو چھوڑ کر کسی اور رب کو تلاش کرو جبکہ وہی الله ہر چیز کا رب ہے سورہ مومن آیت 28 میں ارشاد ہوتا ہے: وَقَالَ رَجُلٌ مُّؤْمِنٌ مِّنْ اٰلِ فِرْعَوْنَ يَكْـتُـمُ اِيْمَانَهٝٓ اَتَقْتُلُوْنَ رَجُلًا اَنْ يَّقُوْلَ رَبِّىَ اللّـٰهُ وَقَدْ جَآءَكُمْ بِالْبَيِّنَاتِ مِنْ رَّبِّكُمْ ۖ ترجمہ: "اور فرعون کی قوم میں سے ایک ایمان دار آدمی نے کہا جو اپنا ایمان چھپاتا تھا کہ کیا تم ایسے آدمی کو قتل کرتے ہو جو یہ کہتا ہے کہ میرا رب اللہ ہے اور تمہارے پاس وہ روشن دلیلیں تمہارے رب کی طرف سے لایا ہے،" ان آیات کے علاؤہ قرآن مجید کی مندرجہ ذیل آیات کی تلاوت فرمائیں: سورہ مومن آیات 61,62 سورہ مومن آیت 64 سورہ فاطر آیت 13 سورہ سورہ یونس آیات 31, 32 سورہ انعام آیات 101, 102 آئمہ معصومین علیھم السلام نے بھی ایسے لوگوں پر لعنت کی ہے جو الله تعالیٰ کے علاؤہ کسی اور کو رب کہتے ہیں یا ایسا عقیدہ رکھتے ہیں حضرت امام جعفر صادق علیہ السلام نے فرمایا : ایک شخص رسول اللہ صلی اللہ علیہ وآلہ وسلم کی خدمت میں حاضر ہوا اور آتے ہی کہنے لگا "السلام علیک یا ربی" (میرے رب میرا آپ پر سلام ہو) یہ سن کر آنحضرت صلی اللہ علیہ وآلہ وسلم نے اس سے فرمایا کہ "خدا تجھ پر لعنت کرے! تجھے کیا ہو گیا ہے؟ میرا رب اور تیرا رب ایک ہی ہیں۔ خدا کی قسم اگر میں تجھے نہ بتاتا تو تو جنگ میں بزدل اور صلح کی حالت میں ناقابل تعریف ہوتا" 📖📚 (میزان الحکمت ، جلد صفحہ ۴۰۱) حضرت علی علیہ السلام نے جناب ابوذر غفاری رضی اللہ عنہ سے فرمایا کہ : "ہمیں اپنا رب قرار نہ دو اور پھر ہماری فضلیت میں جو کچھ کہو کیونکہ تم ہماری کنہ حقیقت و نہایت کو نہیں پا سکتے" 📖📚 (غلو، حقیقت اور اس کی اقسام ، صحفہ 43) تفسیر قمی میں ایک ایسی روایت موجود ہے کہ جس میں امام کو رب الارض کہا گیا ہے جس کو بہت سے مفسرین و محدثین نے اپنی اپنی کتابوں میں نقل کیا ہے پہلی بات تو یہ ہے کہ ایسی روایت جس میں امام کو رب الارض کہا گیا ہے مخالف قرآن ہے جیسے کہ اوپر کچھ آیات پیش کی جا چکی ہیں دوسری بات یہ ہے کہ جہاں تک ہم نے اس روایت پر تحقیق کی ہے اس روایت کا مآخذ صرف تفسیر قمی ہے سب مفسرین و محدثین نے تفسیر قمی والی سند کے ساتھ اس کو نقل کیا ہے وہ ضعیف روایت (جس کا مآخذ تفسیر قمی ہے) کو مختلف کتب احادیث و تفاسیر میں نقل کیا گیا ہے تفسیرِ قمی میں وہ روایت اس طرح نقل ہوئی ہے حَدَّثَنَا مُحَمَّدُ بْنُ أَبِي عَبْدِ اللَّهِ قَالَ: حَدَّثَنَا جَعْفَرُ بْنُ مُحَمَّدٍ قَالَ: حَدَّثَنِي الْقَاسِمُ بْنُ الرَّبِيعِ قَالَ: حَدَّثَنِي صَبَّاحٌ الْمَدَائِنِيُّ قَالَ: حَدَّثَنَا الْمُفَضَّلُ بْنُ عُمَرَ أَنَّهُ سَمِعَ أَبَا عَبْدِ اللَّهِ ع يَقُولُ فِي قَوْلِهِ: «وَ أَشْرَقَتِ الْأَرْضُ بِنُورِ رَبِّها» قَالَ رَبُّ الْأَرْضِ يُعْنَى إِمَامُ الْأَرْضِ... ترجمہ: مفصل ابن عمر نے امام صادق علیہ السلام کو کہتے ہوئے سنا : «اور زمین اپنے رب کے نورِ سے چمک جائے گی» امام نے کہا زمین کا رب یعنی زمین کا امام۔۔ مذکورہ بالا روایت کو اسی سند کے ساتھ مندرجہ ذیل کتب تفاسیر میں نقل کیا گیا (۱) البرھان فی تفسیر القران، الجز الرابع، صفحہ ۷۳۳ ) (۲) تفسیر نور الثقلین، جلد ہفتم، صفحہ 373 (۳) تفسیر صافی، جلد ششم، صفحہ ۳۷۲ (۴) الکوثر فی تفسیر القرآن، الجز ہفتم، ۹۰۵ (۵) تذکرۃ الاطہار، مصنف آیت اللہ علامہ الشیخ مفید رح، مترجم علامہ صفدر حسین نجفی صاحب، صفحہ ۴۹۱ (۶) تفسیر المتقین، صفحہ ۶۰۴ یہ روایت بحار الانوار میں بھی اسی سند کے ساتھ موجود ہے اس روایت میں "مفضل بن عمر" جو امام صادق علیہ السلام سے روایت کو نقل کرتا ہے فاسد المذہب ، مضطرب الحدیث اور ضعیف ہے علامہ نجاشی اس کے بارے فرماتے ہیں کہ " مفضل بن عمر : فاسد المذہب اور مضطرب الحدیث تھے قابل اعتماد نہیں تھے، ان پر بھروسا نہیں کیا جا سکتا۔ 📖📚 (رجال نجاشی (اُردو) صفحہ 587 ) علامہ ابن الغضائری اپنی کتاب "الضعفاء " میں مفضل ابن عمر کو ضعیف لکھا ہے 📖📚 (رجال ابن الغضائری (عربی) صفحہ ۷۹) اس روایت کے بارے میں دور حاضر کے موحد مرجع تقلید آیت اللہ العظمی الشیخ محمد حسین نجفی مد ظلہ العالی سے ایک سوال پوچھا گیا کہ سوال : تفسیر قمی میں سورہ زمر کی آیت ۶۹ میں امام جعفر صادق علیہ السلام سے منقول ہے کہ زمین کا رب زمین کا امام ہے وضاحت فرمائیں؟ جواب : باسمہ سبحانہ: یہ حقیقت ہر قسم کے شک و شبہ سے بلند و بالا ہے کہ رب السموات و الارض اور رب العالمین صرف اور صرف خداوند عالم کی ذات والا صفات ہے، حضرت رسول اللہ ص اللہ تعالیٰ کے رسول اور ائمہ اہلبیت علیہم السلام اللہ تعالیٰ کے ولی اور پیغمبر اسلام کے وصی ہیں۔ تفسیر قمی کی روایت مرسل ہے سند اور مخالف قرآن و اسلام ہونے کی وجہ سے ناقابلِ قبول ہے". 📖📚 (دقائق اسلام، ستمبر و اکتوبر ۲۰۱۶ ، صفحہ ۱۴) اگرچہ قرآن مجید میں بعض مقامات پر لفظی لحاظ سے اور اضافت کے ساتھ غیر الله کے لئے رب کا لفظ استعمال ہوا ہے مگر قرآن مجید اور احادیث معصومین علیہم السلام کے مطابق اس لفظ کا اطلاق اعتقادی لحاظ سے غیر الله پر کرنا یعنی مخلوقات میں سے کسی کو رب الارض کہنا یا پھر رب بمعنی مدبر و متصرف کہنا شرک ہے
