LALDUHOMA LEHKHATHAWN CHU (Remna leh Muanna neih hma, lalthutthleng kian duhlo chungchang leak out; la hre velote tan repost aw) Thawhpui duhtak Pu Sangkhuma, I lehkha pawh vawihnih lai ka lo hmu a. Bus Permit chu hun remchangah C.S. ka lo sawipui ang e. Dt.18.2.86 hian Delhi-ah Budget Session-a ka hming sign ve turin ka kal ang a, kar leh lamah ka lo haw chho leh mai ang. Vairengte leh Bilkhawthlir Public Meeting neih pawh tul ka ti hle a, remruat erawh a harsa hle; March leh April vel chu Zoram chhungah zin kual ve ka tum. Kan party inthlan hun tur hi July ni 25 hmaa zawhfel tur tih a ni a. April thla chhunga inthlan mai ka ngen mek a, General Secretary Anthony khan thutawp a siam mai thei lova, President nen an la ngaihtuah dun dawn a ni awm e. Inthlang thuai thei dinhmunah kan ding tihna a nih chu. Awle, kan hnam damna tura kan damdawi zawrh laiah hian min zawrhpuitute ngei ngei zinga mi 4-te chuan TUR phul an tum a. An phul nual thin a, theihpawpin ka thianfai zel a, damna thlen thei damdawia chhiar tlakin ka la vawng him reng a, "Min venpui rawh u." tih ang kha a nih tak hi. Kan hruaitu lawk ber berten Policy an phatsanna hi a rei tawh a, Asembly-ah te, 'Sual chi hnih ngaihdam theih leh theih loh a awm e' tia kan aute kha hriatthiam tawh tur a ni a. Remna tihchhiat tumin nasa takin an bei a. Chu chauh ni lovin, remna atana thawktu kei ngei hi Delhi hnenah chuan Anti-Party leh Pro MNF anga hek chamchi niin min puh a, ka aia tute emaw dah tura nawrna a awm thin. Mahse Delhi-ah min nawr tla zo lo a, Aizawlah min nawr tla zo bawk hek lo. Anmahni thangah an la awk zar zar a ni. Hetia Policy venghim tura nang leh thawhpui dang ten thahnemngai taka President nihna khatia min lo chelhtir tak khan ka hna chu Policy venhim a ni tih ka hria a, tunah hian, "Engatinge i la ngawih reng? I dawizep em a ni?" i ti mai thei; ka au chhuahpui chuan tute emaw an chhe vek dawn a, lunga denhlum tak an nap mai dawn si a, chu chu Congress Party hian a tuar dawn si. Tumah mualpho lova Remna kan thlen theih tho beiseina ka la neih vang a ni mai. Pu Laldenga an koh duh lohna hi engvang mah a ni lova, a lo dawr dan turah PM a la chiang thei lo a ni. Kei leh CM-in kan thu thlen a inang ta tlat thin lova, a tu zawk nge dik hre turin Sangma, H.M a lo kal a, à report ah P.M a la fiah tawk lova, tunah General Secretary Anthony an rawn tir leh a, fiah zo tak maw? Tuna ka zin hian hna ka thawk zui hlek bawk ang a, chutianga tih hram hrama hlen chhuah theih hi beisei rih ila, a theih loh erawh chuan pen khat pawhin ka tawlh dawn lo va, chet dan dang ka han ruahman ang a, ka zai lo ngai hmasa zel ang che. Tunah hian ram hmangaihtu leh pumpui hmangaihtu kan inthliar mek reng a. Ka lo rin ve em emten Work Order an pawh thlak hnuah Remna thu reng reng an chhakchhuak ta ngai lo!! Tangka sawm thum(30)-a an lalna hralh mai thinte ka hmuh hian ka thinlung hi a na thin a; amaherawhchu zam ngai lo pasaltha nangni angte hi Pathianin a buatsaih mek zel a ni tih ka hriat erawh chuan ka thla erawh a muang em em a ni. Kolasib Town-ah pawh ngaihdan a thuhmun vek ta lo tih ka lo hria a sin. CM leh President hna chelh kawp hi Meghalaya tih mai lo chu an la awm ve ngai lova, mi tih ngai loh a ni. M.P erawh hi chu a dang a, President M.P lo sawi tur India-ah an awm meuh lo. Tin,ani hian a kawp chuan thudik lo do zo tur tumah an awm dawn lova, Remna hi a thleng mai lovang; tih delay chhoh zel a,chumi chhunga Artificial Incident-te siama Cease Fire dan bawhchhiat zeuh zeuh a, tihtawpa lal chhoh zel hi an plan a ni. A chang chuan ban daih te hi ka chak thin a; mahse nang leh kei kan ban thut mai chuan tunge kan ram hi chhanchhuak si ang? Chawl thei/hman kan ni si lo. Chak tak leh huai takin awm phawt ila, kan rah chin a piang Lalpan min pe leh mai ang. A tawpkhawkah Pathian remruatah innghat ila, a remtih loh engmah a thleng si lo.Mi tha lote pawh ni tha lo atan an ni si a. Davida pawh a hun a thlen hma chuan a tlanchhe thin. Inchhung lam harsatna pawh inthlahrung miah lovin han sawi zel rawh. Sd/-LALDUHOMA, 17/2/86 C/p Zoram politics (1976-1986) M.C.Lalrinthanga (He lehkha Pu Sangkhuman a hmu chu mak a ti lutuk a, chet nachang a hrelo an ti!! A awmdan mak tak avang chuan a chhungten an zawt ta sek a, a hrilh ta a ni. Chuta tang chuan he lehkha hi leak chhovin Congress High Committee khan a MP nihna kha Anti-defection Law hmang in a bantir ta a, Pu Duha leh Remna duhtute chuan Congress for Peace din zuiin lalthutthleng kianlo thei lovin Pu Hawla kha an nawr thlu ta a nih kha. Cp

Pu Ksa poh Zirlai pawl ai awh in chawimawi se la