කඨින චීවර පූජාව දායක පක්‍ෂය විසින් සිදුකරනු ලබන්නකි. වස් වස් වසා අවසන් වූ භික්‍ෂූන් වහන්සේ මුල්කරගෙන කඨින සිවුරක් සකස් කරනු ලැබේ. වස් විසීමට ආරාධනා කළ පින්වතුන්ගෙන් කවර හෝ දායක ගෙදරක කඨින චීවරය තැන්පත් කර තිබෙන අතර දායක පිරිස් එකතුවී ශ්‍රද්ධාවෙන් එය සැකසීම තැන්පත් කිරීම ආදිය සඳහන් කළ දායක නිවසේදීම කළ හැක. එය නිවසින් නිවසට වැඩැම්මවීම අනවශ්‍ය ක්‍රියාවකි. මෑත කාලයේ මුදල් ඉපයීම මූලික කරගෙන එලෙස නිවසින් නිවසට වැඩැම්මවීම ඇතැම් පිරිස් සිදුකරන අනවශ්‍ය නුසුදුසු ක්‍රියාවකි. දායකයින්ට බොහෝ කුසල් රැස්වන්නේ වස් තුන් මාසයේදී වස් සමාදන් වූ භික්ෂූන් වහන්සේලාට සිව්පසයෙන් ඇප උපස්ථාන කිරීමෙන්ය. කඨින චීවරයක ආනිසංස බොහෝ රැස්වන්නේ භික්ෂූන් වහන්සේලාටයි. කඨින වස්ත්‍රය පෙරහැරකින් රැගෙන ඒම දායක පක්ෂයේ තීරණයකි. එසේ පෙරහැර නොපවත්වා වුවද මහත් වූ ශ්‍රද්ධාව පෙරදැරි කරගෙන විහාරස්ථානයකට හෝ ආරණ්‍යයකට රැගෙන ආ හැක. එසේ රැගෙන එන කඨින වස්ත්‍රය භික්‍ෂූන් වහන්සේ වෙත සාංඝිකව පූජා කරනු ලබන අතර එය සාංඝික වස්තුවක් බවට පත්කෙරේ. කඨින චීවරය භික්‍ෂුන් වහන්සේට වස් විසීමට ආරාධනා කළ පින්වතුන්ගෙන් කවර සැදැහැවතෙකුට වුවද පූජා කළ හැකිය. කඨින චීවරය සංඝයාට පිදූ විට සංඝයා විසින් සුදුසු භික්‍ෂුවකට එය පවරනු ලබයි. මෙය වස් වසා අවසන් වූ පසු චීවර මාසයේදී එනම් වප් මාස අව පෑල විය පටන් ඉල්මස පුර පසළොස්වක දින දක්වා කාලය ඇතුළත පූජා කළ හැකිය.