Bahot deeno se pratiksha thi Aaj Puri huee hai. Jai Ho dada lakhmi Chand ki aur Jai Dada tule Ram ji ki. Rajbir Singh Panwar surehtiya rohini sector xvii
*कलियुग-गन्धर्व-अवतारी* *सूर्यकवि पं0लख्मीचन्द जी* *रागनी: तर्ज-चौकलिया* *तीर्थ के तुल होगी जग मैं,जुग-जुग बसियो जांटी।* *लख्मीचन्द-सा हीरा जण दिया,धन-धन सै वा माट्टी।।टेक।।* उदमीराम और शिवदेई नै,सच्चा ध्यान धरया होगा। तन-मन-धन तै हरि-नाम का,पाणी खूब भरया होगा ।। जप-तप-व्रत अनुष्ठान कोये,पुन्न और दान करया होगा। ऐसा लाल पावण खात्तर,कोये सच्चा गुरू वरया होगा।। *ब्रह्ममूहर्त मैं नहाये होंगे,नित जमना की घाटी।।1।।* *लख्मीचन्द-सा हीरा जण दिया----* अज़ब-गज़ब सै रचना तेरी,श्रीकृष्ण हे गोबिन्द हरे धन-धन सैं वे मात-पिता जिनैं,पैदा लख्मीचन्द करे। सन्-दिन-तारीख लगन-महूर्त,घड़ी-पल सब आनंद-भरे। पूत के पांह दिखैं पाळणै,बचपन मैं भी छन्द धरे।। *गाम के गोरै गऊं चराई,लेकै हाथ मैं लाठी।।2।।* *लख्मीचन्द-सा हीरा जण दिया----* कलजुग के पहरे मैं जन्में,ब्राह्मणगौड़ वर्ण मैं। शिक्षा-दीक्षा लई बसौदी,सतगुरु की शरण मैं।। मानसिंह द्विज नाम गुरू का,लेट्टे सदा चरण मैं। अनपढ़ रहकै हद करदी,कविताई के करण मैं ।। *ब्रह्मज्ञान बखाण्या सारा,जैसे ब्राह्मण वेद पाठी।।3।।* *लख्मीचन्द-सा हीरा जण दिया---* भरे पड़े भंडार ज्ञान के,इतना दिया दात्ता नै। मरते दम तक भुल्लैं ना उस, सांग-विद्या के ज्ञात्ता नै।। देखकै दंग होज्या दुनिया,मलती रहज्या हाथां नै। मेरे जैसे इब पैड़ पिटैं सैं,सुण-सुण उनकी बातां नै।। *कहै राजेश शर्मा कुछ ना छोड्या,सब कुछ गाग्या ठाट्ठी।।4।।* *लख्मीचन्द-सा हीरा जण दिया----*
