Шымкентте алпауыт компания салып жатқан тұрғын үй кешені кедергі келтірді деген тұрғындар арнамыздан көмек сұрады. Айтуларынша, «Отау Строй» деген серіктестік алғашында шағын кеңсе тұрғызамыз деп, кейіннен көршілердің келісімінсіз 12 қабатты тұрғын үй кешенін көтеріп тастаған. Енді соған жапсарлас орналасқан жеке сектор тұрғындары тынысымыз тарылып жатыр деп ашынады. Оған қоса құрылысшылар төбеде тұрып, төмендегі үйлерге қарай құрылыс қалдықтарын лақтырады дейді шағымданушылар.
Аққайнар көшесіндегі тұрғындар осы кешен салынып жатқалы тіршілігіміз күнде тартыс дейді. Қазір жеке сектор мен көпқабатты нысанның арасы алты метрден алшақ емес.
ГҮЛСАРА НҰРБЕКОВА, тұрғын:
- Заборымды рұқсатсыз, ағаштарымды кесіп, сындырып, ар жағынан көрсетпей, сетка қойып, оның үстінен тікенек проволка тартып қойған. Тоқтарының бәрін менің заборыма байлап, сарайыма дейін байлап қойған. Балалар оны ұстаса, токқа түседі ғой деп оны айқаймен алдырып тастадым. Не деген сұмдық?
У-шудан шаршаған тұрғындар құрылыс жұмыстары күндіз-түні тынбайтынын айтады. Оның үстіне, еңбекке жұмылғандар құрылыс қауіпсіздігін сақтамайды дейді. Арнайы киім кимегенімен қоймай, ауламызға құрылыс қалдықтарын да лақтырады деп ашулы.
ГҮЛМИРА ТӨЛЕУІШОВА, тұрғын:
- Ескі-терезеңді жауып ұйықтаңдар дейді. Қазір мынадай 46-47 градуста қалай біз терезені жауып ұйықтаймыз? Шаңды бұрқыратып камаздармен топырақты түсірген кезде есігіміздің алдының бәрі топырақтан көрінбейді.
«Отау Строй» компаниясының өкілдері тұрғындармен тілдесуге келді. Бірақ әңгімелері жараспады. Кей қызметкерлері телеарнаға сұқбат беруден теріс айналса, енді бірі құрылыс нормалары сақталған деп қысқа қайырды.
АҢСАР СҮЛЕЙМЕНОВ, мердігер компанияның заңгері:
- Техникалық безопасность толық қауіпсіздік қолданылып жатыр. Сақталып жатыр. Строительный норма правила деген бар, соған сәйкес құрылыстың бәрі жүргізіліп жатыр. Ешқандай бүгінгі таңға дейін шағым болған жоқ.
Мердігердің бұл айтқанымен тұрғындар келіспейді. Бірақ, құзырлыларға шағымын жеткізуге мүмкіндігі жоқ. Себебі, жауаптыларға кәсіпкерлерді бет-алды тексеруге болмайды.
ҚАЙРАТ ОРАЛБАЕВ, Шымкент қаласының қалалық орта сапасы және бақылау басқармасының бөлім басшысы:
- Қазір өзіңіз білесіз, мораторий. Бізде жеке кәсіпкерлік субьектілерін тексеруге мораторий жарияланған. Сондықтан бас салып тексеруге құқымыз жоқ. Алайда бізге осы құрылыс барысы туралы есеп келіп отырады. Солар арқылы құрылысты сырттай бақылап отырамыз.
Осылайша, мораторийдің мазмұнына сәйкес, құзырлылар да тек сырттан бақылауға мәжбүр. Жауаптылар мердігердің құжаттары түгел екенін айтты. Тұрғын үй кешені салынып жатқан 2,7 гектар жер 2004 жылы берілген. Бірақ кейіннен нысаналы мақсаты өзгертіліп, жобалық архитектуралық тапсырмасы нақтыланыпты.
МЫРЗАГЕЛДІ СӘРСЕНБЕКҰЛЫ, Шымкент қалалық сәулет және қала құрылысы басқармасының бөлім басшысы:
- 2013 жыл 10-шы қаңтарда Шымкент қаласы әкімінің №4 қаулысымен нысаналы мақсаты ауысқан. Кеңсе, сауда жайларымен және жер асты паркингі бар көпқабатты тұрғын үйлер құрылысын жобалау үшін.
Тура осы қаулы шыққан уақытта Шымкенттің әкімі Қайрат Молдасейітов болатын. Ал ол қазір осы «Отау Строй» компаниясы кіретін Отау групп холдингінің президенті.
Мақсат Жақсыбайұлы
Бізді әлеуметтік желіде оқыңыздар:
RU-vid - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#құрылысқа_қарсылық #Шымкент
28 июл 2021
