Vətən müharibəsində torpaqlarımızı işğalçılardan azad edərkən şəhidlik zirvəsinə ucalan xaçmazlı döyüşçü Fərid Seyfullayevin qızı dünyaya gəlib.
İyunun 1-də Xaçmaz Rayon Mərkəzi Xəstəxanasında dünyaya göz açan körpə bu gün evə buraxılıb. Şəhidin həyat yoldaşı Ağabacı Seyfullayeva və körpəsinin vəziyyəti normaldır.
Fəridin yeni doğulan övladı xəstəxanadan evə ailə üzvləri, Xaçmaz Rayon İcra Hakimiyyəti, “YAŞAT” Fondunun nümayəndələri və şəhidin döyüş yoldaşlarının əhatəsində yola salınıb. Körpəyə Səma adı verilib. Bu F.Seyfullayevin ikinci övladıdır. Şəhidin digər qızı Aylanın bir yaşı var.
Fərid Xeyrulla oğlu Seyfullayev 1991-ci ildə Xaçmaz şəhərində anadan olub. Hərbi xidmətini başa vuran Fərid Aprel döyüşlərindən sonra Daxili Qoşunların xüsusi təyinatlı dəstəsində xidmətə başlayıb. Füzulidən Şuşayadək döyüş yolu keçib. Qəhrəman döyüşçü noyabrın 6-sı Şuşa uğrunda gedən döyüşlərdə yaxınlığında mərmi partlaması nəticəsində şəhidlik zirvəsinə ucalıb. Ölümündən sonra “Füzulinin azad olunmasına görə”, “Şuşanın azad olunmasına görə” və “Vətən uğrunda” medalları ilə təltif olunub.
Şəhid Fərid Seyfullayevin övladının zəruri xərcləri “YAŞAT” Fond tərəfindən qarşılanıb. Bu məqsədlə 1000 AZN anaya təqdim olunub və dünyaya yeni göz açan körpənin adına 5000 AZN-lik hesab açılacaq. Həmin hesaba vəsait fonda edilən ianələr hesabına toplanmış məbləğdən köçürülür. Həmin məbləğin üzərinə mütəmadi olaraq faiz toplanılacaq və həmin şəhid övladı 18 yaşına çatdıqdan sonra toplanan məbləği özü hesabından çıxara biləcək.
Qeyd edək ki, bankla ana arasında bağlanmış müqaviləyə əsasən zəruri hallarda ana həmin vəsaiti daha tez çıxara biləcək. Həmçinin ana həmin məbləği istənilən valyutaya da dəyişə bilər.
3 июн 2021
