Ermənilərin cəbhə xəttində təxribatı davam edir. İşğalçı Ermənistan ordusunun Füzuli rayonu istiqamətində atəşkəsi pozması nəticəsində şəhid olan hərbi qulluqçumuz, Fikrət Nurşirəvan oğlu Bəşirov doğulub boya-başa çatdığı, Astara rayonunda dəfn edilib. Şəhidin vida mərasimində rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin əməkdaşları,yerli hüquq-mühafizə orqanlarının rəhbərləri, rayon ictimaiyyətinin nümayəndələri və hərbçilər iştirak edib.
Astara rayonunun Şahağacı kənd sakini 36 yaşlı Fikrət Bəşirovun nəşi ötən gün axşam saatlarında doğma kəndinə gətirilib. Şəhidlə vida mərasimi yaşadıqları evdə baş tutub. Vida mərasimindən sonra o, yüzlərlə rayon sakinin iştirakı ilə son mənzilə yola salındı. Müddətdən artıq hərbi qulluqçu olan Fikrət Bəşirov Şahağacı kənd qəbrstanlığında dəfn olunub. Daha sonra hərbçilər tərəfindən yaylım atəşi açılıb.
Fikrət Bəşirovun hərbçi yoldaşları onun məzarı başında mənfur düşməndən şəhidin qisasını alacaqlarına and içdilər. Şəhidin tabutuna bükülmüş 3 rəngli bayraq isə atasına verildi.
Şəhid Fikrət Bəşirov ölümündən sonra Müdafiə naziri general-polkovnik Zakir Həsənovun əmrinə əsasən "Hərbi xidmətdə fərqlənməyə görə" 3-cü dərəcəli medalı ilə təltif olunub. Qeyd edək ki, bir neçə gün bundan əvvəl şəhid hərbi qulluqçumuzun qızı dünyaya gəlib.
29 сен 2024
