Şabranın Ləcədi kəndi rayon mərkəzindən çox da uzaqda yerləşmir. Amma sakinlər yolun narahatlığından gileylidirlər. Deyirlər, yağış, qar yağdısa, kəndə nə gələn olur, nə gedən. Kəndin tibb məntəqəsi yoxdur, elə bu səbəbdən canı ağrayan sakinlər özünü bir yolla rayon mərkəzinə çatdırmalıdır. Ləcədinin dərd-səri bununla da bitmir, kəndin məktəbi də yoxdur. Xeyli sakin övladının təhsili üçün kəndi tərk etmək məcburiyyətində qalıb. Olan-qalan uşaqları isə valideynləri hər gün qonşu kəndə piyada aparıb gətirir. Ləcədi sakinləri deyir, onları seçkidən seçkiyə yada salan olur. Seçki bitdisə, Ləcədi yenə unudulur. Bir zamanlar xalçaları ilə ad çıxaran bu kənddə indi işsizlik hökm sürür. Sosial müavinət almaq isə min bir əziyyətlə başa gəlir, bəzən heç mümkün olmur.
16 сен 2024