Xıdo Əli Nasiri rəhmət bıkə ! Amin !
Az çı Midiyə Atropati nəvəm ha !... ( Əli Nasir )
İminə yo mı çaş oka, qəmım jə,
Çı tarixi lap ə sıpyəsıvəm ha!...
Sığım toşə az sığo ləmım jə,
Sığə devri pos nıvardə təvəm ha!...
Mığon azim, Sığon azım, azim Az,
Çı Bazzi barz, Vazəru vaz azim az,
Şı "Avestə" nıvıştə dast azim az,
Zərdüşti roy ruşin kardə avəm ha!..
Həx həmişə bo nohəxon tel bə, tel,
Azim Tolış, azim Kaspi, azim Qel.
Gasbu şımə yodon beka Qavqamel,
Az çı Midiyə Atropati nəvəm ha !...
Bobok çımı Bıləbandi əğıl be,
Ğıyrətıjən bənə ağli nığıl be.
Bəçəy dardi dılım sute,çığıl be,
Həni vəse,vey sutəm, vey təvəm ha!...
Bə İsmayıli ki soyb beşe, nığoj doy?
Ki Xətai şahış karde de şoy-voy?
Hardəbili şeyxonro ro-bınəm noy,
Şeyx Zahidim, şeyxon yolə bıvəm ha!...
Dədə Tolış, nuşo bıdə ıştəni,
Imruj ıştı voşniyə ço vəştəni.
Iştı avlod boçi bətı oştəni?
Çan sorone bəvon az bə lovəm ha !...
Əli Nasiri vırə vəşt bıbu !
5 сен 2024
