Авантурите на Итар Пејо е нова македонска хумористична серија во која најпознатиот мариовец пали и гаси. Тој е лек за жени, кошмар за попови и даскали и голем мајтапчија. Во улога на Итар Пејо настапува прилепскиот актер Игор Трпчевски.
Итар Пејо е еден од најпознатите ликови во македонските народни приказни, кој е многу омилен меѓу младите читатели. Итар Пејо, некаде познат и како Итроман Пејо или Итар Пејо - Мариоец е обичен сиромашен македонски селанец од Мариово кој се одликува со извонредна итрина, снаодливост и воедно е претставник на македонската шегобијна мудрост. Во приказните за него тој секогаш на итар начин им се оддолжува на тие што сакаат да му наштетат (обично турските големци), а неговите постапки често изнудуваат смеа и почит кај читателите. Нема историски потврди за неговото постоење и веројатно се појавил како противтежа на османлискиот итроманец и шегаџија Насрадин Оџа во духовниот отпор на македонскиот народ против османлиското угнетување. Во многу македонски народни приказни со шеговити или сатирични мотиви и фабули, тој токму него редовно го надмудрува. Итар Пејо често ги насамарува и лакомите селски попови. Забележани се голем број прозни записи, каде што е главен јунак, а бил честа тема и на нашите хумористи и карикатуристи. За него има преку триесетина приказни кои во збирката "Итар Пејо" најпрвин ги има собрано писателот Стале Попов (познат хроничар и раскажувач на Мариово)
10 сен 2013
