#НартайАралбайұлы #NartayNews #НартайНьюс #nartaynews #Еңбекадамы
🔹Спикер: Анар Сейдалиева - автокөлік жөндеуші.
Қазақстанда төрт жарым миллиондай көлік бар. Бір астананың өзінде 500 мыңдай машина заңды тіркеуде тұр. Олардың қатары жыл сайын өсіп барады. Нәтижесінде, сол көлікке арналған қызмет түрлері де көбейіп, кәсіпкерлік те дамып жатыр. Мысалға, біз жылына кемі екі рет темір тұлпарымыздың тағасын ауыстырамыз. Көбіміз қолға кілт ұстап, дөңгелекті бұрап, шаң шаң болғымыз келмейді. Ал, кейбір адамдардың ондайға ебі де, икемі де жоқ. Сондықтан, дөңгелек жөндейтін жерге барамыз. Яғни, шиномонтаж. Бірақ, сол дөңгелекпен кәсібін дөңгелетіп отырғандардың дені білекті, қарулы жігіттер. Олардың орнында әйел адамды елестету қиын. Алайда, сондай қара күшті талап етітін жұмысты қазақтың қыздары да істей алады екен. Бүгінгі кейіпкеріміз Анар Сейдалиева дөңгелекті шыр көбелек айналдырып, ұршықша иіріп жүр.
Анардың ауылдастары ғана емес, көрші елді мекендегілерге дейін кейіпкерімізді жақсы таниды. Алыс жолға шығайын деп жатқандар Анарға ғана сенім артып, дөңгелектерін сайлап алады. Бұл кейіпкеріміздің шеберлігінің айқын дәлелі болса керек. Бұдан бөлек, Анар жылыжай ұстауды да меңгерген.
Өкінішке қарай, қазір жастар арасында жеңіл жұмысқа ұмтылатын, талай кәсіпті ауыр деп қашатын, қит етсе жалқаулыққа басатындар көп. Соларға бүгінгі кейіпкеріміз үлгі болса екен дейміз. Қалауын тапсаң қар жанады дегендей шын қалаған адамға жұмыстың ауыры болмайды. Әйтпесе, қолына зілдей темірді алып, мұздай кілт құралды ұстап, батпаққа малынған дөңгелекті көтеріп жүру әйел заты былай тұрсын, еркектерге де оңай шаруа емес. Бірақ, адал еңбекті сүйген адам бейнеттен қашпайды. Себебі, зейнеті боларын біледі. Кейіпкеріміз жұмыс пен үй шаруасына да үлгеріп жүрген аялы ана, адал жар, үлгілі келін. Мұны да айта кетпеске болмас. Хош, қазақ қыздары қашан да қайсарлығымен танылған. Сан түрлі салада еңбек етіп, көпке ұлгі болып жүрген нәзік жандылар жетерлік. Бүгінгі кейіпкеріміз де сол өнегенің өрісін жалғап тұр. Сөз соңында айтарым, бүгінгі бейбіт заманда батыр кім десе? Тап осындай адал еңбектің адамдарын батыр дер едім. Әйтпесе, ақшаға арын сатып, жемқорлыққа малынып, қулық сұмдыққа салып жүргендер қаншама. Сананы тұрмыс билеген заманда ардың тазалығы алтыннан қымбат.
“Еңбек адамы" елеусіз қалмасын! Биыл біз тұтас фильмдер сериясын жасауға бел будық. Басты қолдаушымыз AMANAT партиясы. Кейіпкерлеріміз қарапайым қызметкерлер, бірақ үлкен жүректі, еңбекқор, өмірге құштар адал адамдар. Бұған дейін экрандардан тек өнерпаздар мен шенеуніктерді көретін едік. Бұл дұрыс болмады, олқылықтың орнын толтыру керек. Біз соны мойнымызға алдық. Бұйыртса 40 фильм жарыққа шығады. Көріңіздер!
Интаграм: ...
Фейсбук: / nartai.sarsengaliyev
29 сен 2024
