Өз ауласында бес адамды атып тастаған Игорь Дужнов пен оның әйелі Анаида Демирчян үйден шығару бойынша шыққан Алматы қалалық сотының шешіміне аппеляциялық шағым түсірмеген. Тіпті банктен 102 миллион теңге несие алғанда екі бірдей жылжымайтын мүлікті кепілге қойған ерлі- зайыптылардың тағы бір баспаналары бар екені белгілі болды.
10 жыл бұрын банктен заңды тұлға ретінде 102 миллион теңге несие алған ерлі-зайыпты Анаида Демирчян мен Игорь Дужнов кепілге сауықтыру кешені мен дәріхана және күзет киоскісімен бірге қосып жер телімін қойған. Одан бөлек, Алатау ауданындағы жер үйін де кепілзат ретінде рәсімдеген.140 миллион теңгеден астам сомаға бағаланған сауықтыру кешенін жеке сот орындаушысы 187 миллион теңгеге бағалаған көріпті. Бірақ, кешен ақыры банкке 96 миллион теңгеге сатылып кеткен. Десе де, әлі қарызын толық жаппаған отбасының кепілде тұрған үйі электронды сауда-саттыққа түсіп, өзгенің меншігіне өткен.
АБАЙ ЖАРЫЛҚАСЫН, Алматы қалалық соты:
- Аталмыш отбасыны тұрғын үйден шығару мәселесін тұрғын үйдің жаңа меншік иесі бастамашыл болған. Ол осы үйді сатып алған соң екі жылдан соң, сотқа аталмыш Джуновтың отбасын шығару бойынша талап-арызбен жүгінген. Осы талап-арыз 2020 жылы 10 маусымда Алатау ауданының сотының шешімімен қанағаттандырылды.
Жеке сот орындаушысы 187 миллион теңгеден астам сомаға бағаланған сауықтыру кешені негізгі қарыз, яғни 102 миллион теңгені жаба алмаған. Заңгерлер, көп жағдайда кепілдегі мүлік нарықтық бағадан бірнеше есе төмен сатылып кетінін айтады әрі әділетсіздік дәл осы жерде басталады дейді.
ШОЛПАН РИЗАБЕКОВА, «ЕЛ БІРЛІГІ» одағының президенті:
- Жеке сот орындаушылар сату барысында сот шешімінде көзделген соманы көрсетпей төмендеткен кезде жеке сот орындаушы өзінің қызығушылығын көрсетеді. Неге, себебі сату сомасын төмендетіп отыратын болса, демек үшінші тұлғаға сату барысында оның өзінің де қызығушылығы бар деген сөз.
Бір сәтте бес адамның өлімін мойнына арқалаған тұрғынның қылмысын мүлдем ақтауға келмейді дейді заңгер Шолпан Ризабекова. Тек, мұндай қасіреттің қайталанбауы үшін жеке сот орындаушылардың мәртебесі туралы заң қайта қаралуы тиіс дейді. Сондай-ақ, азаматтар жалғыз баспанасын кепілге қойғанда отбасындағы кәмілеттік жасқа толмаған балалардың бар екенін банк тарапы қатаң ескеруі қажет дейді. Алматы қалалық соты Анаида Демирчян мен Игорь Дужновтың отбасы әлеуметтік осал топқа жатпайтынын әрі бұл іскер ерлі-зайыптылардың тағы бір баспанасы бар екені анықталды деп отыр.
Әйгерім Ердәулет
Бізді әлеуметтік желіде оқыңыздар:
RU-vid - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#АлматыдағыАтыс #полиция #Ақбұлақ #кредит
20 сен 2021