Жаман жолға түспеңдер Арақ-шарап ішпеңдер... Бұл арақты ішіп еді қай бабаң Ішпек түгіл ауызын да шаймаған Алла бізге харам деді арақты Зияны көп болғаннан соң пайдадан...
Осыдан бір жылдай бұрын бір ағайынымыздың 100 күндік садақасына бардым. Ет келгенде сиырдың бір шекесі ақсақалдар отырған бас табаққа келді. Ақсақалдар оны "құда" деп, менің қасымда отырған бір орта жастағы кісіге тартты. Ет жеп болған соң, садақасы болып жатқан кісінің екі соқталдай баласы келіп, бата сұрады. Менің қасымда отырған "құда" аузын жыбыр-жыбыр еткізді де, "аумин" деп бетін сипады. Оның басқа не айтқанын басқа адамдар түгілі қасында отырған мен естіген жоқпын. Құлақ жейтін бала қалмады Бата беретін дана қалмады демекші батаны ойыншыққа айналдыратын адамдардың бар екені қынжылтады. Малға кедей- жарлы Сөзге кедей- сорлы деп ата-бабамыз айтқандай осындай сорлылардың көбеюі кезінде: "сен мені сыйлайсың ба? Сол үшін алып қояйық" деп арақ ішілетін совет заманының сарқыншағы сияқты көрінеді. Ал енді Қуандық қажы ақсақалдың бата беруі маған ескінің көзі, асылдың сынығы, от ауызды, орақ тілді бабаларымыздың жалғасындай елестейді. Жас ұрпаққа өнеге, ізін қуғандарға үлгі болатын осындай ақсақалдарымыз көп болсын, тірі болсын, ірі болсын, жыл өткен сайын жасарып арамызда жүре берсін дегім келеді ағайын!
