ОРАМАЛ ҚАЛДЫ ӘН БОЛЫП….
Қазақ өнеріне, Торғай мәдениетіне өлшеусіз үлес қосқан дарынды күйші, сазгер, сахнагер, «Торғай Шәмшісі» атанған ҚР-ның еңбек сіңірген мәдениет қызметкері Болат Хамзаұлын еске алу кеші…
Торғайда өнер туын тіккен, ел-жұртты әсерлі әндермен сусындатқан, кең даланы саз әуенімен тербеткен тегеурінді талант - Болат Хамзиннің шығармаларын естімеген, тыңдамаған жан жоқтың қасы.
Болат Хамзин. Бұл есім торғайдың еңбектеген баласынан қартына дейін таныс. Болат Хамзин 1938 жылдың мамыр айында Торғайдың 13-ші ауылында дүниеге келген. 1955 жылы Торғайдағы Ы.Алтынсарин атындағы атындағы орта мектепті бітіргеннен кейін, Алматы қаласындағы Құрманғазы атындағы мемлекеттік консерваториясына оқуға түседі. Студенттік жылдарында ерекше қабілеті мен дарындылығын танытып, халыққа белгілі өнер қайраткері Нұрғиса Тілендиев, Шара Жиенқұловалармен бірге Құрманғазы атындағы халық аспаптар оркестрі құрамында сахнада өнер көрсетті. Консерваторияны ұлт-аспаптар оркестрі дирижері мен домбыра класы бойынша аяқтап, Еңбек жолын бастауда туған жеріне келіп Мәдениет үйінен ансамбльдің көркемдік жетекшісі, халық театрының режиссері, аудандық мәдениет бөлімінің меңгерушісі қызметтерін атқарды. Еңбегі елеулі ұлы тұлғаның тарих беттерінде алтын әріппен жазылған есімі жемісті еңбегі мен бойындағы тума талантының арқасы.
19 фев 2023
