ДАЛЕР НАЗАРОВ
Далер Назаров (Назаров Далер Меҳрубонович; 8 сентябри 1959, Душанбе, ҶШС Тоҷикистон) - оҳангсоз, сароянда ва ҳунарпешаи синамои тоҷик.
Далер Назаров 8 сентябри соли 1959 дар шаҳри Душанбе дар оилаи санъатшинос, дромнавис Меҳрубон Назаров ба дунё омадааст. Фаъолияти эҷодии худро дар ибтидои солҳои 1980 оғоз намудааст. Вай бештари умри худро дар Душанбе, пойтахти Тоҷикистон гузаронидааст. Ҳамчун сарояндаи эстрада ва композитори тоҷик ва ҳунарпешаи синамо машҳур шудааст. Дар солҳои Ҷанги шаҳрвандӣ (1992 - 1997) маҷбур шуд, ки зодгоҳашро тарк кунад. Солҳо дар Алматӣ, Қазоқистон зиндагӣ кард, баъд ба Душанбе баргашт.
Чеҳраи ҳунарии ӯ ҳамчун сарояндаи соҳибҳунар дар ҷодаи эстрадаи навини тоҷик, ки мусиқи фолклори тоҷикро дар сабти оҳангҳои эстрадии «поп-фолк» таълиф намуда месарояд, маъмул аст.
Мавод аз Википедиа - донишномаи озод
НАРГИС БАНДИШОЕВА (1966 - 1991)
Наргис Бандишоева (8 октябри 1966 - 21 сентябри 1991) - яке аз номдортарин овозхонон ва ситораи ҳунару фарҳанги мусиқии Тоҷикистон аст.
Наргис 8 октябри 1966 дар Душанбе дар хонаводаи оҳангсози маъруф Ҳукуматшоҳ Бандишоев ва ҳамсараш Бунафша Бекова зода шуда буд. Вай бародарзодаи ҳунарпешаи мардумии Тоҷикистон овозхони номдор Савсан Бандишоева ва оҳангсозу наққоши маъруф Марватшоҳ Бандишоев мебошад.
Наргис дастпарвари мактаби мусиқии «Чайковский» дар Душанбе буда, падараш дастпарвари Консерваторияи Маскав (ҳамкурси А. Пахмутова ва З. Шаҳидӣ) навохтани фортепианоро ёдаш дод. Пас аз таҳсил дар ин мактаб Наргис дар Донишкадаи ҳунарҳои зебои ба номи Мирзо Турсунзода аз омӯзгоронаш инчунин устод Меҳрубон Назаров, падари Далер Назаров ҳунаромузи кард.
Наргис донишҷӯи соли панҷуми Донишгоҳи Мирзо Турсунзода буд, ки соли 1989 дар озмуни «Нахустин ҳунарнамоии ҷавонон» ширкат кард. Вай бо суруди шуғнии Олег Фезов «Лалаик» дар ин озмун пирӯз шуд ва соле пас дар ҷашнвораи «Иссиқ-Кӯл - 89» ширкат кард ва барандаи унвони «Мисс Иссык-Куль - 89» шуд ки арзёбие буд аз ҳунару шеваи овозхонии нотакрораш. Дар пайи пирӯзӣ дар ин озмун ӯро барои ширкат дар озмуни «Юрмала» дар Маскав даъват карданд. Ширкат дар ин озмун барояш такондиҳанда шуд: як шарти ин озмун ин буд, ки овозхонон бо фонограмма суруд мехонданд. Ҳангоме ки Наргис ба саҳна баромад, касе аз бадандешонаш фонограммаашро гум кард то вай натавонад ҳунарнамоӣ кунад. Ин рӯйдод бар вай чунон асар гузошт, ки дертар ҳатто нахост дар озмуни «Садои Осиё» ширкат кунад, ҳарчанд ки дар ду даври нахусташ баранда шуда буд. Аммо наздиконаш водораш карданд, ки аз ширкат дар ин озмун рӯй натобад.
Озмуни «Садои Осиё» дар соли 1989 яке аз муҳимтарин рухдодҳои фарҳангӣ дар Иттиҳоди Шуравӣ буд. Барои ширкат дар ин озмун 150 овозхон довталаб шуданд, аммо доварон барои ширкат дар бахши ниҳоӣ танҳо 30 касро интихоб карданд, ки аз беҳтарин ҳунармандону овозхонони кишвар махсуб мешуданд. Аз Тоҷикистон дар ин озмун ба ҷуз Наргис ҳамчунин Д. Назаров, К. Қурбонов, П. Назаров, О. Фезов ва П. Юсуфӣ низ ширкат доштанд.
Наргис дар ин озмун пирӯз шуд ва ситораи мусиқии Тоҷикистон ва Осиёи миёна гашт. Вай бештар сурудҳоеро бар ашъори номдортарин шоирони тоҷик месуруд ва сабки вижа ва нотакроре дошт ва то кунун дар Тоҷикистону ҷаҳон дӯстдорони бешумор дорад.
Наргис Бандишоева 21 сентябри 1991 дар садамаи худрав дар роҳи Варзоб - Душанбе ҳалок шуд. Ӯро дар Душанбе ба хок супурданд.
Мавод аз Википедиа - донишномаи озод
ОЛЕГ ФЕЗОВ
Олег Фезов - мусиқидон, овозхон ва оҳангсози тоҷик.
Олег Фезов 23 майи соли 1963 дар шаҳри Душанбе ба дунё омадааст. Аҷдодаш аз Бадахшон буда, дар санъати мусиқии тоҷику афғон хидмат намудааст. Соли 1990 Омӯзишгоҳи бадеииро бо ихтисоси рассоми ороишгар хатм кардааст.
Дар солҳои Ҷанги шаҳрвандии Тоҷикистон Олег Фезов ба Маскав муҳоҷират кард. Баъдтар ӯ аз он ҷо ба Олмон рафта, он ҷо қарор гирифт. Пас аз 22 сол зиндагӣ дар Олмон ба Тоҷикиситон баргашт ва соли 2019 шиносномаи тоҷикиро ба даст овард.
Олег Фезов аз охири солҳои 1980 қадамҳои нахустини худро ба саҳна гузошта, дар баробари ин, касби бастакорӣ ва танзимкориро пеша намуда, баъдтар сурудхонӣ мепардозад.
Хусусияти мафтункунандаи Шарқ ва асари соддалавҳонаи санъат ҳамҷоя бо кордонии инструменталӣ, истифодабарии ҳам асбобҳои мусиқии ба ҳама маълум ва ҳам асбобҳои мусиқии халқӣ (соз, ӯд ва ғайра) ин албомҳои Олег Фезовро намунаи «мусиқии ҷаҳонӣ» мекунанд.
Соли 1993 дар Олмон албоми ӯ бо номи «Лалайки Помир» мебарояд. Сурудҳои беҳтарини ин албом ба бисёр маҷмӯаҳои шинохати мусиқиҳои этникӣ дохил шуданд: Voice of Europe (ҳамчун намояндаи мусиқии ИДМ), Crossing Cultures ва дигарон. Соли 1995 Лалайки Помир аз тарафи ширкати Miramar/BMG дар ИМА аз нав мебарояд.
Соли 1997 ширкати Manas Records (Русия) дар Олмон албоми дуюми Олег Фезовро бо номи «Лакатум» мебарорад. Инчунин, албоми якум, Лалайки Помир (MR 7002) низ такроран бароварда мешавад. Лакатум дар муддати кӯтоҳ ба даҳҳаи дуюми руйхати World Music (дар ҳолати майи соли 1997) медарояд, ки ин ҳодисаи фавқуллода дар таърихи сабти овозии Тоҷикистон мебошад.
Мавод аз Википедиа - донишномаи озод
7 сен 2023