Жамбыл облысы Жаңатас қаласындағы өрттен көз жұмған бес бүлдіршін жер қойнына тапсырылды. Қара жамылған отбасы балаларын сенбі күні көрші ауданға қарасты Үшарал ауылындағы қорымға апарып қойды. Өрттің шығу себебі әлі анықталған жоқ. Куәгерлер, жедел жәрдем де, төтенше жағдай қызметі де кеш келді дейді. Ал бес балақайдың төртеуін өртке оранған үй ішінен анасы өз қолымен алып шыққан екен.
Елдің қабырғасын қайыстырған трагедия дәл осы үйдің үшінші қабатында болған. Бақиға аттанған бес баланың әкесі аудандық ауруханада бухгалтер болып жұмыс істейді. Ал анасы мұғалім, бірақ декреттік демалыста болуына байланысты үйде отырған. Көршілері, жас отбасы шамамен 5 жыл бұрын көшіп келді дейді. Айтуларынша, жұма күні келіншек бесіктегі сүт кенжесін емізіп, ұйықтатқан соң, азық-түлік алуға дүкенге кетіпті. Ал түскі үштер шамасында көршілерінің бірі ашық терезеден түтін шығып жатқанын байқап, бірден анасына хабар берген. Бірақ ол кезде үйдің өртеніп жатқаны білінбеді дейді олар. Аз уақытта алып-ұшып балалардың анасы да келіпті.
АЛТЫНКҮЛ ЖАМАЛБЕКОВА, Жаңатас қаласының тұрғыны:
- Баклажка су және сүлгі беріңіз деді. Мен аштым. Бердім. Бірақ айқайлаған жоқ. Айқайласа бәріміз шығар едік қой. Ашсам мына жердің барлығы дым. Шыға алмайсың.
Бұл кезде пәтерден шыққан түтін үйдің бүкіл кіре-берісін басып қалған. Сондықтан бірде-бір адам ішке кіре алмай, тағы бірнеше уақыт өтіпті. Ақыры, күткен көмек келе қоймаған соң, әйелдің өзі пәтерге кіріп, алдымен кенжесін, кейін тағы 3 перзентін алып шықты дейді көршілері.
САДЫҚ ЕГЕМБЕРДИЕВ, Жаңатас қаласының тұрғыны:
- Полға дейін түтін вот этого пластмасса. Не түтін это. Как то не...Мен кірдім де, мына жерге дейін кірдім де қайтып шығып кеттім.
Көршілері, түтінге тұншыққан төрт бүлдіршінді көліктеріне салып алып, аудандық аурухананың жансақтау бөліміне жеткізген. Бірақ бәрі де кеш болыпты. Ал оқиға орнына келген төтенше жағдай қызметкерлері үйден бесінші баланың мәйітін алып шыққан. Қазір қайғылы оқиға болған көп қабатты үйдің ауласында өлі тыныштық. Тұрғындар осы оқиғадан соң, әлі де естерін жия алмай жүргендерін айтты. Сөздерінше, бұл бір ғана отбасының қайғысы емес, әрбір қазақстандық үшін ауыр соққы, жалпыұлттық трагедия.
ГАЛИНА КОКУЛОВА, Жаңатас қаласының тұрғыны:
- Но детки красивые, нарядные. Я не знаю. Наверное нет такого человека.
Әзірге бес баланың өмірін қиған өрттің неден шыққаны белгісіз. Нақты себебін анықтау үшін сараптама жұмыстары жасалып жатыр деді мамандар.
ЕРМЕК МОМБАЕВ, Жамбыл облыстық ТЖД бастығы:
- Зерттеу жүргізу барысында оқиға орнында электр қондырғылары, жағымсыз сымдар немесе өзге де жылыту құралдары болмаған. Балалар бөлмесінде өрт басталған. Өрттің қызу себебінен тез жанатын құрылғылар әсері тиген. Обой деп жатамыз, сайднинг дейміз.
Бақилық болған бүлдіршіндер сенбі күні Талас ауданы, Үшарал ауылында жер қойнына тапсырылды. Қазір бір сәтте бес перзентінен айырылған жас отбасына психологтар көмек көрсетіп жатыр екен. Ал жергілікті билік өкілдері, қара жамылған әулетке барлық қажетті көмек беріледі дейді.
Бізді әлеуметтік желіде оқыңыздар:
RU-vid - / @informburo31kanal
Facebook - / informburo31
Instagram - / informburo31
Vkontakte - informburo31
TikTok - www.tiktok.com/@informburo31
WhatsApp Информбюро +7 777 331 31 31
#бес_періште #Жаңатас
21 фев 2021
