Елімізде бизнеске кедергі келтіретін санитарлық талаптар саны азайтылады.
Бұл туралы Үкіметтегі баспасөз жиынында Қоғамдық денсаулық сақтау комитеті төрағасының орынбасары Берік Шәріп мәлімдеді. Санитарлық ережеге барлығы 34 өзгеріс енеді. Бірқатарына тоқталсақ, мәселен, жекеменшік балабақша ашсаңыз, онда асхана және тазалық құралдарын сақтайтын арнайы бөлме болуы талап етілмейді. Сондай-ақ мектепке дейінгі шағын мекемеде қосымша ойын және жатын бөлмелерін ұйымдастыру қиындық туғызса, аталған аймақтарды біріктіруге рұқсат беріледі. Балаларға арналған шағын орталықтардың аумағы 30 шаршы метрден кем болмауы тиіс деген ереже де алынып тасталады.
Берік Шәріп, ҚР ДСМ Қоғамдық денсаулық сақтау комитеті төрағасының орынбасары:
- Елімізде көлеңкелі бизнес көп деп айта алмаймын. Бірақ мемлекет тарапынан қойылып отырған шарт-талаптарды орындай алмай отырған кәсіпкерлер жоқ емес. Мейлі балабақша немесе жеке емхана болсын санитарлық ережелерді сақтай алмағандықтан, жасырын қызмет көрсетуге мәжбүр. Осындай кедергілердің алдын алу үшін біз тексерістер мен санитарлық ережелер тізімін қысқарттық.
22 авг 2024