ЖУМА КУНИДА КАҲФ СУРАСИНИ ЎҚИШ ФАЗИЛАТИ
Каҳф сурасининг фазилати тўғрисида Набий алайҳиссалом бундай деганлар: “Ким Каҳф сураси бошидан ўн оят ёдласа, дажжол (ёмонлиги, фитнаси)дан сақланади” (Имом Муслим, Абу Довуд, Термизий, Насаий, Аҳмад ривоятлари).
Дажжол Қиёматга яқин чиқиб, илоҳликни даъво қилади, одамларни йўлдан оздиришга ҳаракат қилади. Агар унга ишонсалар, уларга осмондаги Ойни ваъда қилиб, кофир бўлишга ундайди. Шундай қўрқинчли ва таҳликали кунда Каҳф сурасини ўқиб, уқиб юрган мўминлар Дажжолнинг фитнаю ёмонликларидан йироқда бўладилар.
Расулуллоҳ (соллаллоҳу алайҳи васаллам): «Ким Каҳф сурасини жума куни ўқиса, унинг учун ўзи ва икки жума ўртасини ёритувчи нур порлайди», - деганлар (Имом Ҳоким «Мустадрак»да ривоят қилганлар. Санади саҳиҳ).
Саҳл ибн Муоз ибн Анас жуҳанийдан, у киши отасидан ривоят қилади: «Расулуллоҳ (соллаллоҳу алайҳи васаллам): «Ким Каҳф сурасининг аввали ва охирини ўқиса, оёғидан бошигача нурга кўмилади (нурли бўлади). Ким уни тўлиқ ўқиса, унинг учун осмон билан Ер масофасича нур пайдо бўлади (порлайди) (Имом Аҳмад ва Табароний ривоятлари).
Бугун муборак жума, Каҳф сурасини ўқинг ва зикр қилинган ҳамда қилинмаган фазилатларга эга бўлинг.
Манба: Isloh.uz || t.me/islohuz ||
Muxlis media канали.- / @muxlismedia
8 сен 2024