Арчамозор* тоғига чиққанимга кўп бўлди,
Тошин ёнига тошдек чўкканимга кўп бўлди.
Болалигим ўтган жой , энг севимли кўркам жой,
Сувларидан ҳовучлаб ичганимга кўп бўлди!
Отам қуриб берган уй, ҳовлида гул қиқирлар,
Гул устида шом-саҳар қушчалари питирлар.
Устунин қучоқласам келар тоза сатрлар,
Остонасига оёқ ечганимга кўп бўлди!
Даласида қўшиқлар айтиб катта бўлгандим,
Ҳар кун даладан уйга қайтиб катта бўлгандим,
Қиш тунлари олмалар арчиб катта бўлгандим,
Ялангоёқ тупроқни кечганимга кўўп бўлди!
Йўлга чиқсам йўллари қувонади кўргандан,
Оппоқ узун қанотлар чиқар икки елкамдан,
Меҳр оламан тўйиб акам, опам, укамдан,
Шу меҳрни сут каби ичганимга кўп бўлди...
Борай яна онамни кўзидан бир ўпгани,
Дардларимни унутиб, ғуборимни тўккани,
Этагимга бир дунё куч ва қувват тўккани,
Чунки митти шам каби ўчганимга кўп бўлди...
Сувларидан ҳовучлаб ичганимга кўўп бўлди…
*Арчамозор - Сафед Булон қишлоғида жойлашган тоғ
@Risligoy_Hotamova_ijodi
4 авг 2024