Өфөлә ВДНХ-экспо майҙанында Бөтә донъя башҡорттары ҡоролтайы (конгресы), «Мираҫ» фонды, «UJU» фото студияһы һәм мәктәбе ҡатнашлығында «Өфөлә матурлыҡ көндәре» сараһы уҙҙы. Ойоштороусыһы - «STIKHIA STUDIO» проектына нигеҙ һалыусы Эльвира Ишморатова. Сара стилләштерелгән башҡорт этник кейемдәрен һәм биҙәүестәрен популярлаштырыуға һәм үҫтереүгә йүнәлтелгәйне.
Сарала «Хыялдар тормошҡа аша» тип исемләнгән кейеҙҙән тегелгән кейемдәр һәм баш кейемдәре коллекцияһы менән «Kristi Shapelle», «Күңел» коллекцияһы менән «Aie-Brand» дизайнер бренды, «Яҙ. Һөйөү. Өмөт» тип аталған түшелдеректәр менән Наилә Мортаева, милли биҙәүестәр бренды «Аҫылташ», «Оберег» бисерҙан биҙәүестәр коллекцияһы менән Валентина Михайлова һәм «Стиль һәм Шарм» трикотаж ептән сумкалар коллекцияһы менән Светлана Хәлитова сығыш яһаны.
«Bashkir Ethno - Moda Day» - популяр йолаға әүерелеп барыусы сара. Мода - ул мәҙәниәт теле һәм заманса ысынбарлыҡта йолаларҙы һаҡлап ҡалыу өсөн уникаль мөмкинлек. Һеҙҙең өсөн республикабыҙҙың һәләтле дизайнерҙарының исемен асыусы, күркәм коллекциялар тәҡдим итеүсе проект тәҡдим итәбеҙ. «Bashkir Этно-Мода Day» беҙҙең төбәктә генә түгел, бөтә донъяла ла этно-моданы популярлаштырырға ярҙам итә«, - тип фекере менән уртаҡлашты проектты ойоштороусы Эльвира Ишморатова.
29 сен 2024
