Бүгін таңғы ондар шамасында 312-ші атқыштар дивизиясы даңғылында 4 көлік түйісіп қалды. Жүргізушілер апатқа бір ауыздан көпір үстінде Камаз жүк көлігін тоқтатқан жол-патрульдік полициясының қызметкерлерін кінәлады. Алайда олар біздің түсіру тобымызды көріп, оқиға орнынан ізін суытты. 4 көліктің екеуі жеңіл, біреуі Камаз жүк көлігі және бірі қалалық электр жүйесі құрылысы мекемесінің апаттық қызмет көлігі. Айтуларынша Ресейден Шымкентке жылқы тиеп бара жатқан Камаз жүк көлігін көпір үстінде жол-патрульдік полициясы өрескел тоқтатқан. Біріншіден көпір үстінде көлік тоқтатуға болмайды. Екіншіден жол-патрульдік полициясы "Камаздың" алдын кескен. Полиция тоқтатқан Камаздың артынан "Газ-53" апаттық қызмет көлігі соққан. Оның жүргізушісі Нұрсұлтан Исаев бұл апаттың алдын алу мүмкін болған жоқ дейді. Куәгерлер апаттық электр қызметі көлігіне "Ниссан Санни" мен "Опель" соғылғанын көрген. Алайда облыстық ІІД баспасөз қызметінің жетекшісі Ардагер Уайдиннің сөзінше, 312-ші атқыштар дивизиясы даңғылы бойында бір мезетте 2 көлік оқиғасы болды. "Ниссан " мен "Опель" бір-біріне соғылған және оның Камаз бен "ГАЗ-53" арасындағы жол-көлік оқиғасына еш қатысы жоқ. Ал апаттық қызмет көлігі "Ақтөбе электр жүйесі құрылысы" серіктестігіне тиесілі. Қаладағы электр желілерін жөндейтін зертханалық жалғыз техника енді жарамсыз. "ГАЗ-53"-тің жолаушысы да апатқа жол-патрульдік полициясын кінәлайды. Ең сорақысы, жол-патрульдік полициясының қызметкерлері артынша бұл жағдайдан бастарын алып қашқан. Апат орнына екі сағат ішінде бір де бір жол полициясы келген жоқ. Одан кейін бриагада жетіп, оқиға орнында тергеу-анықтау жұмыстары жүргізілген. Тәртіп сақшыларының қаншалықты заңды әрекет еткенін анықтау үшін де қызметтік тексеру жүргізіледі.
30 сен 2024
