Талас облусунун Беш-Таш коругуна Алтайдан 35 марал алынып келинген. Аталган долбоор КР президентинин Талас облусундагы ыйгарым укуктуу өкүлүнүн демилгеси менен ишке ашырылган. Жаныбарларды алып келүүнү “Альянс Алтын” ЖКЧ каржылап 2,5 миллион сом өлчөмүндөгү каражат сарпталган. Маралдар үчүн атайын корук уюштурулган, курчалган аймак жаныбарларга тардык кылганбы, айтор, чөбү такырайта оттолгон. Тоюту аз болгонгобу, же жаңы аймакка отурукташкангабы маралдар арык. Ал эми жаныбарларды кайтарган кызматка шарт түзүлгөн эмес. Шарты жок кызматкерлер шалаакылыгынанбы, же башка себеп мененби тосмодо 12 марал калып, калганы чыгып кеткен. Тийиштүү тараптын билдирүүсүндө тоонун түбүндө кичинекей жер тосулбай калып, ошол өткөөлдөн чыгып кетишкен, кызматкерлер тосуп жетишкен эмес. Байланыш тартпаган тоонун арасында, шарты жок суук чатырдагы жалгыз кызматкер тосмок турсун, карап үлгүрбөсө керек.
КР Талас облусу боюнча ыйгарым укутуу өкүлү бакытбек Нарбековго кайрылып көрдүк. Алгач маралдар түгөл камалып турганын айткан өкүл ошол маралдар турган жерден келе жатканыбызды угуп актанууга өтүп, маралдар көзөмөлдө, болгону корукка киргизүү иштери жүргүзүлүп жатканын билдирди. Толук материал СОКОЛ МЕДИА маалымат борборунун ютуб каналына 26- август күнү саат 21:00 чыгат.
25 авг 2022
