Марқакөл жұрты батыр Қожамбет бабаны еске алып, тағзым асын берді. Өз атасын ұлықтаған марқа халқы ат шаптырып, түрлі ұлттық ойындарды өткізді. Дүбірлі тойға арна тілшілері де куә болды. Сюжеттен көрейік.
Марқакөл өңірі Қожамбет руының ата қонысы саналады. Қожамбеттен тараған ұрпақ бабасына құран бағыштап, тағзым асын берді. Ұйымдастырып, шараның бас-қасында жүрген азаматтардың айтуынша, дүбірлі той өткізіп, ас беру 2 жылдан бері жоспарда болған екен.
Дүбірлі думанда көптің назары бәйгеде болды. Марқакөл-Қожамбет қоры жүлдеге 4 автокөлік тікті. Құнан бәйге, жорға, жабы жарысынан бөлек аударыспақ пен көкпар ұйымдастырылды. Соңғы жылдары күршімдіктер қазақы жабыны жарысқа қосуды қолға алған. Бұл бәйгеде қалжырлық Фархат Садыбаев баптаған жүйрік топтың алды болды.
Бәйгеде күршімдіктердің асығы алшысынан түсті. Жабы жарысынан бөлек, құнан бәйге мен жорғада да бас жүлдені иеленген жергілікті атбегілер.
Балуандар күресіде бәсекеге толы болды. Мықтылар екі салмақта белдесті. Өгіз палуандар бәсекесінде күршімдік Ерасыл Тұрсымбеков қарсылақ шақ келтірмеді. Түйе палуандар арасындағы сында атақты Мұхит Тұрсынов жеңімпаз атанды.
Ат үстінде арпалысқан жігіттердің бәсекесінде ақтық сын әкесі мен баласы арасында өтті. Ұландық Жәкішовтер әулеті осы спортты насихаттап жүрген жандардың қатарында.
Ұйымдастырушылардың айтуынша дүбірлі тойды өткізу үшін 60 миллионға жуық қаражат жиналған. Ұлттық ойындар жүлдесі де қомақты болды. 4 автөлікткен бөлек ақшалай сыйақылар мен мотоциклдерде тігілді.
6 сен 2024
