Ушул жылдын 27-июнь күнү Мысырдын белгилүү дарыгери Мохамад Мешали 76 жашында бул дүйнө менен кош айтышты. Карапайым эл арасында бул кишини “кедейлердин догдуру”, “жардылардын Айболити” деп атап коюшкан. Ал өз өмүрүнүн 50 жылын кедей-кембагалдардын саламаттыгына арнаган. Колунда жок адамдарды бекер тейлеп, болгон аракетин жумшаган. Бейтаптардан символикалык баа катары болгону 10 фунт, биздин акчага 50 сомдун тегерегиндеги акы алчу. Ошол акчаны да бере албагандарды акысыз кабыл алып, дары-дармек таркатчу. Доктор Мешали өзү да кедей үй бүлөдө чоңоюп өскөн. Кедейликтин азабын бир-туугандары менен далай жолу тарткан. Атасынын өлүм астында “Ар дайым кедейлерге жардам бергин” деген осуяты анын мындай адамгерчилигинин негизги себеби деп түшүндүрөт.
25 окт 2020
