Муғанний "Қазо қасидаси" 

Муғанний
(Ғанижон Холматов)
Қазо қасидаси
Бисмиллаҳир Роҳманир Роҳим!
Бу қоғозга тўкилган оҳим.
Дунё азал томошахона,
Қазо дамлар шундан нишона.
Аста-секин чироқ ўчади,
Қисмат томошага кўчади.
Қазо келса сўрамас руҳсат,
Етибди-да бизга ҳам фурсат.
Томоғимга тўлган ғарғара,
Тўрга тушиб қолган қарқара.
Қўрқитмагин мени, Илоҳим!
Ирғитмагин мени, Илоҳим!
Фариштангга қўйгин тайинлаб-
Ҳақларингни олсин майинлаб.
Кўчир мени сакаротинда,
Учир мени саҳар отинда.
“Ла илаҳа иллаллоҳ...”ингда,
Ўтиб, яна турай роҳингда.
Салом сенга, қазо фаришта-
Вазифангни қилгил саришта!