Ата дініміз исламның негізгі бес парызының бірі - намаз, діннің тірегі, құлшылықтың абзалы. Өзін мұсылман санайтын пендені Жаратушысына мойынсұндырып, қанағат пен өзге де қайырлы амалдарға бастайтын ғибраты мол ғибадат. Жат әдеттер мен арсыздықтан тыятын, азғындықтан сақтайтын құлшылық һәм рухани азық.
Нақты айтқанда, намаз - жұмақтың кілті. Сондықтан намазды дұрыс орындау - мұсылмандар үшін ең маңызды міндет.
Пайғамбарымыз (с.а.с.): «Уа, үмбетім һәм сахабаларым! Бүкіл шарттарына сай толық орындалған намаз - Алла Тағала жақсы көретін істердің ең мәртебелісі, пайғамбарлардың сүннеті, періштелердің ең сүйкімді ісі, жер мен көктің нұры, тән саулығының қайнар көзі, ризық-несібенің берекесі, дұғалардың қабыл болуына септігін тигізетін себептердің үлкені, жан алғыш періштеге араша түсетін шапағатшы, қабір әлемінде Нәкір мен Мүңкір атты періштелердің азабынан құтқаратын жауап. Қиямет күнінде - жанға сая. Жәһаннам отына тосқауыл қоятын перде. (Қылдан жіңішке, қылыштан өткір) Сират көпірінен жарқ еткізіп өткізетін пырақ. Жұмақтың кілті. Жұмақ жұртында киер тәжің. Алла Тағала мүміндерге намаздай маңызды құлшылық жүктемеген. Егер намаздан артық ғибадат түрі болғанда, Алла Тағала құлдарына соны міндеттер еді. Шын мәнінде, періштелердің бір шоғыры ұдайы намаздың қиямында, тағы бір бөлігі үнемі рүкүғта, тағы бір тобы сәждеде, енді біреулері тәшәһһуд қалпында құлшылық етіп тұрады. Міне, осылайша құлшылықтың хикметке толы қасиеттерін бір рәкағат намазға жинақтап, мүміндерге сыйлады. Ақиқатында, намаз - иманның басы, діннің тірегі, Исламның сөзі әрі мүміндердің миғражы»,-деген!
Қасиетті Құранда: «Сабыр және намазбен жәрдем тілеңдер. Расында намаз ынталылардан басқаларға ауыр келеді» («Бақара» сүресі, 45-аят).
Бұл аятты тәпсірші Мұхаммед Али ас-Сабуни былай түсіндірген: «Барлық іс-әрекеттеріңізде нәпсілеріңізге ауыр келетін діни міндеттеріңіздің жауапкершілігін сезіне отырып, діннің тірегі намазды оқи отырып, Алладан жәрдем сұраңыз. Еш күмәнсіз намаз Алла разылығы үшін рухани тазарған, мойынсұнғыш және кішіпейіл жандардан басқаларға қиын әрі ауыр келеді».
Әлбетте, бұл парызды шынайы ықыласпен түйсініп оқыған адам намазды өзіне өмірлік #ДОС ЕТІП АЛАРЫ СӨЗСІЗ!
#СӘТТІЛІК!
5 сен 2024