Америкалық мегаполистегі орталықтардың біріне музыканттың жақындары мен достары жиналды. Осындай шараның мұхиттың арғы жағында өтуі бекерден емес.
Қазақстанның Еңбек сіңірген мәдениет қайраткері ЮНИСЕФ-тің ізгілік елшісі болғандықтан, Нью-Йорктегі БҰҰ штаб-пәтеріне де жиі келетін. Ал ұлы Мақсұт АҚШ-тың Флорида штатында анасымен бірге тұрады.
Музыканттың өмірінде маңызды орын алған азаматтардың бірі Владимир Заславский де осы АҚШ-та.
Батырхан Шүкенов қазақ эстрадасына зор үлес қосқан. Оның мезгілсіз қайтыс болуы қазақстандықтарды абдыратты. Кеште әншінің «халық әндері» болып кеткен туындылары орындалды.
Владимир Заславский, Батырхан Шүкеновтің ұстазы
-Батырдай досымнан айырылу мен үшін орны толмас қайғы. Өмірімнің жарқын бір бөлігі сөнгендей көрінеді. Алайда мен өзімді бақытты адамдардың қатарына қосамын. Себебі Батырханмен бірге жұмыс істеп, көп уақытты ортақтаса өткіздік. Сансыз фестивальдар мен гастрольдерге бірге бардық. Оның шығармашылығын әлемнің үздік музыканттары мойындаса да, ол кішіпейіл де қарапайым болып қала берді. Біздің есімізде де ол мәңгі сол қалпында қала бермек.
Жанна Орынбасарова, әнші
-Батыр ерекше адам болды. Барлығымыз оған қарап бой түзеу керекпіз деп ойлаймын. Батыр өмірден өтсе де, ғайып болмайды. Оның әндері қазақстандықтардың жүрегінде мәңгі қалады.
2 окт 2024
