29 июл баъди ифтитоҳи якчанд иншооти таъйиноти гуногун дар ноҳияи Шаҳристон Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо роҳбарону фаъолон ва омӯзгорони ноҳия мулоқоти самимӣ доир карданд.
Президенти мамлакат муҳтарам Эмомалӣ Раҳмон нахуст кулли сокинони ноҳияи Шаҳристонро ба ифтихори сисолагии истиқлоли давлатӣ - ҷашни бузурги мардуми Тоҷикистон ва ифтитоҳи мактаби навбунёди замонавӣ самимона табрик гуфтанд.
Дар робита ба омодагии ноҳия ба истиқболи ҷашни бузурги миллӣ- 30 - солагии Истиқлоли давлатӣ таъкид гардид, ки дар ҳудуди ноҳия то имрӯз дар 104 иншооти ба нақша гирифташуда корҳои ободониву бунёдкорӣ ба анҷом расонида шудаанд.
Мактаби навбунёди рақами 19, ки имрӯз дар деҳаи Ободӣ барои 1240 нафар хонанда ифтитоҳ гардид, намунаи заҳмати созандаи сокинони ноҳияи Шаҳристон арзёбӣ карда шуд.
Бояд гуфт, ки ба хотири беҳдошти сатҳи зиндагии сокинони ноҳия дар доираи сафари кории Президенти мамлакат лоиҳаи бисёр муҳим - хатти оби нӯшокӣ барои бо оби босифат таъмин намудани 10 ҳазор нафар ба истифода супорида шуд.
Таъкид гардид, ки аз ҷониби Ҳукумати мамлакат давоми солҳои соҳибистиқлолӣ барои рушду тараққиёти ноҳия аз ҳисоби ҳамаи сарчашмаҳои маблағгузорӣ беш аз 2,5 миллиард сомонӣ равона гардидааст. Аз ҷумла, дар ин давра дар ноҳия 9 лоиҳаи сармоягузории давлатӣ ба маблағи 1,6 миллиард сомонӣ амалӣ гардида, ҳоло иҷрои боз 7 лоиҳаи инфрасохторӣ идома дорад.
Соли 2012 нақби “Шаҳристон” ба истифода дода шуд, ки тавассути он сокинони ноҳияи Шаҳристон ба пойтахти мамлакат рафтуомади озод доранд. Ғайр аз ин, 45 километр шоҳроҳи байналмилалии “Душанбе - Чаноқ” аз ҳудуди ноҳия гузашта, робитаи аҳолии ноҳияи Шаҳристонро бо тамоми минтақаҳои Тоҷикистон ва кишварҳои ҳамсоя дар чор фасли сол таъмин менамояд.
29 июл 2021