Шарен и разигран беше денеска центарот на градот, кој беше преплавен со маскирани дечиња.
Деца од градинката „Ангел Шајче“ и учениците од одделенска настава во „Крсте Мисирков“ со своите наставнички и негувателки излегоа на Градскиот плоштад, за да го прослават 1 Април - Светскиот ден на шегата.
Можеа да се видат еднорози, глувчиња, принцези, фудбалери и полицајци, каубојци и индијанци, вештерки и добри вили, кои случајните минувачи срдечно ги поздравуваа најмалите. Дел од оние кои ги затекнавме на плоштадот, главно родители, баби и дедовци, уживаа во радоста на дечињата.
„Еве и ние излеговме да ја израдуваме малку Николија, мало зајаче. Има само 9 месеци, уште не оди, ама постојано се врти да ги види поголемите деца. Видете само како ги отворила очите, се впива, не ни обрнува внимание, не можеме ни да ја насмееме. Само впива се околу неа, интересно и шарено и е“, истакнаа родителите на малата Николија.
Учителките, ги анимираа дечињата да рецитираат или испејат нешто што го имаат научено пред присутните, но и самите се потрудиле да дојдат маскирани, за да не се „делат“ од учениците.
„Децата дојдоа возбудени утринава, не сакаа ни да појадуваат, туку бараа веднаш да тргнеме. Едвај се убедивме дека е рано. Дојдоа подготвени од дома, сите различно, кое како сакало, немаме тематски маски. Малку се посредивме на училиште и еве не, очигледно е колку се среќни, весели и возбудени“, истакна Веридијана Божиновска, учителка во „Крсте Мисирков“, која беше маскирана како Мини Маус.
Пријатното време измами повеќе шетачи од вообичаено, кои на свој начин се приклучија на забавата.
31 мар 2024
