Муус устар 18 күнүгэр Намҥа М.К.Аммосов аатынан култуура киинигэр бэйиэт, СӨ суруйааччыларын сойууһун чилиэнэ Анна ПАРНИКОВА - Сабарай Илгэ төрөөбүтэ 65 сылыгар анаммыт ахтыы киэһэтэ өрө көтөҕүллүүлээхтик биир тыынынан буолан ааста. Ахтыы киэһэҕэ Дьокуускай куораттан ыҥырыылаах ыалдьыттар филология билимин дуоктара, ХИФУ профессора Варвара Окорокова, суруйааччылар Ольга Корякина-Умсуура, Саргылана Гольдерова-Саргы Куо, “Күрүлгэн” сурунаал эрэдээктэрэ Афанасий Гуринов-Арчылаан о.д.а. кыттыыны ыллылар.
Хайдахтаах курдук поэзия эйгэтигэр ураты буочардаах, хомоҕой тыллаах бэйиэт дьахтар олорон ааспытын бу кэрэ киэһэҕэ сылдьан көрөн-истэн биллибит-иһиттибит. Дьиҥинэн, Анна Алексеевна эдэригэр Свердловскайдааҕы университет философскай уонна Ленинградтааҕы университет библиотечнай факультеттарыгар үөрэнэ сылдьыбыт эбит. Ол эрэн дойдутун ахтылҕана баһыйан, төннөн кэлэн төрөөбүт Партизанын бөһүөлэгэр айар үлэ умсулҕаныгар охтубут. 3 хоһооннорун хомуурунньуга “Куйаас сайына”, “Күн баҕам” уонна “Күһүҥҥү ыһыаҕым” бэчээттэммиттэрэ. Кини олоҕун бүтүннүүтүн поэзияҕа анаабыт “үрдүкү поэзия уһулуччулаах бэрэстэбиитэлэ этэ” - диэн бу күн мустубут дьон ахтан-санаан аастылар.
Этэҥҥэ буоллаҕына, аны күһүн балаҕан ыйыгар хоһооннорун хомуурунньуга тахсара былааннанар.
12 сен 2024
