"Ретро шедевр" кўрсатуви
"Маҳалла" телеканали
Ҳар йили баҳорнинг илк кунлари юракларни тўлқинлантириб, телеканалларда, радио тўлқинларида таниқли санъаткоримиз Икромжон Бўронов ижросида куйланган “Сен баҳорни соғинмадингми?” қўшиғи бугунги санъаткорларимиз томонидан ижро қилинади. Уни қиш бўйи баҳорни соғинган ҳар бир юрак ўзгача энтикиш билан тинглайди. Шу кунларга етганига шукроналар келтиради. Яратувчининг борлиққа шундай гўзалликлар ато этганидан кўзи, қалби қувончларга тўлади. Бўй кўрсатган ҳар бир гиёҳ, гуллаётган ҳар бир новда, тиш ёраётган ҳар бир япроқ юракда номсиз ҳислар уйғотади.
Умр ўтган сайин инсондан узоқлашиб борадиган, айни пайтда ҳаёт чархида сайқал топиб, одамнинг қалбидан чуқур ва мустаҳкам жой оладиган соғинчли хотиралар ҳамиша азиз ва қадрлидир. Болаликдаги, ёшлик пайтингиз ва ўрта ёш даврларда кўрган, таниган-билган, ҳамсуҳбат бўлган кишиларингиз, ёру ошналар, бегоналар, турфа хил қиёфалар… Наинки ана шу сиймолар, балки қачондир ўқиган севимли китобларингиз, мактаб партасида ёд олинган шеърий сатрлар, димоғингизда хиргойи қилиб юрган ашулалар бора-бора қадрдон ҳамроҳингизга айланиб қолганини сезмай ҳам қолар экансиз. Орадан неча йиллар ўтиб, турмуш ташвишлари аро тасодифан ана шундай бир хотира парчасига дуч келсангиз, беихтиёр чанг босган олис умр йўллари хаёлингиз кўзгусида чарақлаб ёришиб кетгандай туюлади. Абдулла Орипов қаламига мансуб “Сен баҳорни соғинмадингми?!” шеъри асосида куйланган қўшиқ инсоннинг ана шундай олис-олис хотираларини уйғотади, уйғоқликка чорлайди.
Шеър - руҳият тадқиқи, туйғулар тасвири. Унда озод ва покиза кўнгилнинг гоҳ майин, гоҳ нолакор, гоҳ ўтли , гоҳ мунгли манзараларини кўришингиз мумкин.
5 сен 2024
