Зам зуурт ажил амжуулсаар төлөвлөж байснаасаа оройтох төлөвтэй болов. Энэ зуурт Алдарт хэдэнтээ залгаж "хаана яваа"-г асуух нь яарч буйг илтгэх. Бид ч бас нар шингэхээс өмнө зураг авалтаа амжуулах санаатай тул хэрдээ л яарах.
Хэнтий аймгийн Мөрөн сумын нутаг буюу Чандганын тал ороод зочин руугаа залгавал угтан тосохоор боллоо. Төд удалгүй бид Чингис хаан хотын угтах хаалган дээр уулзалдан, Хэрлэн голыг зорьсон ч замдаа цэцэрлигт хүрээлэнг дээр хэмээн үзэж тэндээ зогсоод тоног төхөөрөмжөө зөөж эхлэв.
Дор бүрнээ бэлтгэл хангаад ярилцлага эхлэхийн өмнө зочин маань "Чи надаар яг юу яриулах гээд байна. Би хүнд яриад байхаар баялаг намтартай хүн биш шүү дээ. Хүний дургүй хүргэчихэлгүй шиг хэд гурван үг хэлээд салах минь. Чамд за гээд хэлчихсэндээ бантаад л ирлээ" хэмээн шивнээд амжив.
-Яагаад? Ярих зүйлгүй гэж. Хэлж байгаад азарга түрүүлгэсэн хүн хэр олон байдаг юм. Тэр тусмаа тэгш ойн жил, улсын наадамд шүү. Тэгээд ч таны амжилтын цувааг ажиглаж байсан, азарга голдуу давхиулсан юм байна лээ. Азарганы уяанаас эхлээд л ярина ш дээ. Гол нь та өмнөх шигээ гоё чөлөөтэй ярина шүү" би ингэж хариулаад ярилцлага эхэлсэн.
Тэр ярилцлага буюу "Тод магнай" подкастын 97 дахь дугаар 9-р сарын 5-ны даваа гарагт үзэгч, сонсогч та бүхэнд хүрнэ. Энэ удаагийн зочин бол Хэнтий аймгийн Дадал сумын уугуул, МУ-ын Алдарт уяач Намнангийн Дарамренчин байх болно. Туувраас авсан алаг азаргаа АХ-ын 79 жилийн ойд аман хүзүүнд хурдлуулж, дараа жил нь буюу АХ-ын 80 жилийн ойд түрүүлгэсэн аз өм нь халгисан эр.
Алаг азарганы удам угшил ч бас сонирхолтой л юм билээ.
11 сен 2024