Баубек батыр 1820 жылы қазіргі Ақмола облысы Жақсы ауданы жерінде дүниеге келген. Руы Қарауыл. Әкесінің ата-тегі дәулетті адамдар болған. Шешесі - Шұға. 9 жасында ата-анасынан айырылған ол Кенесары ханның әскер жинақтап жатқанын естіп, сонда келеді, ханның бәйбішесі Күнімжан оны туған ұлындай қабылдап, өсіріп жеткізеді. Бұл жерде әскери тәсілдерді үйреніп, есейген Баубек, әр тұрлі жорықтарға қатыса бастайды.
Баубек алғашқы шайқасқа 15-16 жас шамасында қатысқан. Сол жолы атышулы қырғыз батыры Отыншыны жекпе-жек ұрыста жеңіп, содан кейін есімі елге батыр ретінде жария бола бастайды. Ол Кенесары Қасымұлының ұлт-азаттық көтерілісін ұйымдастыруы мен әскери іс-қимылдарын жүргізуі кезінде ханның ең сенімді көмекшілерінің біріне айналады. Кенесары мен оның інісі Наурызбай тұтқынға түскенде, Баубек те солардың қасында болады. Елім деп еңіреген баһадүрлер қаскөй дұшпан ның қолынан қазаға ұшыраған сәтте Баубек ебін тауып, жау құрсауынан қашып шығады. Содан туған өлкесіне оралады.
Кенесары көтерілісінің дауылы басылғаннан кейін Баубек өзінің туыс-туған, рулас ағайындарымен бірге Есіл өзеніне құятын Терісаққан өзенінің бойына көшіп қонады. Сол маңдағы қазіргі Терісаққан ауылы - бағзы күндердегі Баубек батырдың қонысы.
Патша өкіметіне қарсы соғысқа қатысқан, қарапайым халықтың қорғаушысы болып, олардың шексіз құрметіне бөленген жанға қатігез билік кең тыныстау мүмкіндігін берсін бе? Көп ұзатпай, саяси көзқарастары мен бұлжымас берік ұстанымдары үшін патша әкімшілігі батырды Ресейдің Түмен облысына жер аударады. Айдауға кетіп бара жатқанда жарықтық қылышпен бір саусағын шауып түсіріп, «Бұл сапардан оралмайтын шығармын. Менің көз жұмғаным жайлы хабар жетсе, мүрдемнің орнына осы саусағымды жер қойнына тапсырыңдар» деп аманаттап тастап кетсе керек. Айтқандай-ақ, ұлттың қамын ойлаған алып жүректі тұлғаға елге есен-сау оралу нәсібі бұйырмай, 1884 жылы айдауда жүріп, бақиға аттанады.
3 окт 2024
