Бугун Хива шаҳрида Хоразм вилояти ҳокимлиги, Ўзбекистон Республикаси Ёшлар сиёсати ва спорт вазирлиги, Этноспорт ассоциацияси ҳамкорлигида ўтказилаётган Халқаро этноспорт фестивали очилди. Тантанали тадбирда Ўзбекистон Республикаси Президенти Администрациясининг Ижтимоий ривожланиш департаменти раҳбари Одил Абдурахмонов, Хоразм вилояти ҳокими Жўрабек Рахимов, Россия Федерацияси Спорт вазири Олег Матыцин, Озарбайжон Республикаси Ёшлар ва спорт вазири Фарид Гаипов иштирок этиб, барчани фестивалнинг очилиши билан самимий муборакбод этдилар.
Фестиваль доирасида:
- белбоғли кураш бўйича халқаро турнир;
- ўзбек жанг санъати, масс реслинг, баҳодирлар ўйини ва тош кўтариш бўйича жаҳон чемпионатлари;
- камондан отиш бўйича халқаро очиқ турнири, миллий кураш, бел олиш ва уч кураш, турон яккакураши, камондан отиш, қушлар ови ва от спорти турлари бўйича кўргазмалар;
- моҳирошпазлар иштирокида ош пишириш мусобақаси;
- миллий овқатлар ва қовун сайли;
- Бутунжаҳон Этноспорт конфедерациясининг “Мерос билан боғланган, этноспорт билан бирлашган” шиори остида этноспорт саммити;
- Бутунжаҳон Этноспорт конфедерациясининг Ижроия қўмитаси аъзоларининг учрашуви;
- Театрлаштирилган концерт дастури ташкил этилади.
Фестиваль тадбирлари билан фоторепортажларимиз орқали мунтазам таништириб борамиз.
7 сен 2023
