Мурадов Шагь-Эмир Билалан хва - лезги шаир. Дагъустандин АССР-дин халкьдин шаир.
Билалан хва Шагь-Эмир Мурадов Самур магьалдин (гилан Докъузпара райондин) Къурушрин хуьре 1913 йисуз дидедиз хьана. Сифте юкьван мектебда, гуьгъуьнай пединститутда кӀелай Шагь-Эмира муалимвал, радиода, журналда редакторвал авуна. «Социализмдин пайдах» ва «Дагестанская правда» газетрин редакцияда журналиствилени кӀвалахнай. Саки 60 йисуз туькӀуьрунрал зегьмет чӀугур Ш-Э. Мурадова гьакӀни урус, азербайжан чӀаларай лезги чӀалаз элкъуьрунар авунай. Зари 1996 йисуз Магьачкъалада гьахъ дуьнядиз фена.
Шаирдин сифтегьан эсерар 1930 йисуз акъатнай ва дишегьлийрин ихтияррин азадвилиз, социализмдиз, Ватандин ЧIехи дяведиз талукь тир. Дяведилай кьулухъ халкьарин дуствилиз ва Ватандиз кьарувилиз теснифнавай «Бахтлу Дагъустан», «Лацу лифер», «Сувахъанрир манияр» тӀварар алай кӀватӀалар акъатнай. 1970-80 йисарин къене адан «Цавар хьтин вили», «Инсанвилиз баркаллагь хьуй», «РикӀяр рикӀиз» шииррин кӀватӀалар; «Сувара эквер», «Демир ва Селми», «Зулун эверун», «КӀанивиликай кьиса» поэмаяр акъатнай. ГьакӀни Мурадова рубаияр ва сонетар кхьизвай. Адан эсерра кьетӀен чка ашкьидин лирикади ва тӀебиатдиз кьарувили кьунва. Идалайни гъейри, шаирди СССР-дин халкьарин поэзия лезги чӀалаз элкъуьрзавай. Абурук А. С. Пушкинан, Лермонтован, Некрасован, Я. Купаладин, Маяковскийдин, Гь. Расулан эсерарни кваз.
Заридиз 2000-йисуз хайи хуьре художник скульптор Гь.Гьейбатова теснифнавай гуьмбет эцигна.
Текст взят с сайта: lez.wikipedia.org/wiki/Мурадо...
#лезгины #лезгияр #лезгиманияр
10 ноя 2021
