Վարդենիսի (Ազատ գյուղ) զինվորական կացարանի հրդեհի գործով մայիսի 24-ի դատին ցուցմունք է տվել հրդեհից փրկված զինվորներից Ժիրայր Սահակյանը։ Նախորդ դատին նրան հարցեր էին տալիս դատախազներն ու տուժողների ներկայացուցիչը, վերջինին՝ ամբաստանյալների պաշտպանները։
Մեղադրյալի աթոռին նստած փոխգնդապետ Գոռ Աղեկյանը հրդեհից փրկված զինվորին նախատում էր ոչ բավարար հերոսության համար (ըստ կալանավորված սպայի, մարդիկ հերոսանում են, երբ իրենց կյանքը զոհաբերելով փրկում են ուրիշներին)։ Նախկին բանտապետ, ներկա փաստաբան Արթուր Գոյունյանը դժգոհում էր զինվորի անտարբերությունից (որպես նախկին քննիչ և դատախազ՝ նա ակնկալում էր, որ տուժողը պետք է սեփական քննությունն անի)։ Հարցերը հիմնականում կրկնվում էին։
Ամբաստանյալների նստարանին զորամասի թիկունքի գծով փոխհրամանատար Գոռ Աղեկյանն է, զորամասի կոմունալ ծառայության պետ Մառլեն Սարգսյանը, վաշտի հրամանատար Գոռ Մարգարյանը, ինժեներասակրավորական ծառայության պետ Տիգրան Ղազարյանը և կապիտան Եղիշե Հակոբյանը։
Նրանցից միայն Եղիշեն է դեպքի վայրում եղել։ Պաշտոնական վարկածի համաձայն՝ 2023-ի հունվարի 19-ի գիշերը նա փորձել է թեժացնել կացարանի մուտքի մոտ տեղադրված վառարանը, որպես կպչան բենզին է օգտագործել, բոցը տվել է դեմքին, մեխանիկորեն ցած է գցել բենզինի 5-լիտրանոց տարան, հրդեհը րոպեների ընթացքում պատել է մուտքի դուռը և ձգվել դեպի կացարանի խորք։ Օրապահ Լևոն Խառատյանն ու կապիտան Հակոբյանը փորձել են մարել այն՝ չի ստացվել, և դուրս են եկել վառվող կացարանից։ Կազարմայում քնած զինվորները՝ 17 հոգի, մնացել են պաշարված։ Ըստ ցուցմունքների, մեծ մասը չի արթնացել նույնիսկ այրվող համածառայակիցների գոռոցներից։ Պատուհանները փակված են եղել ճաղավանդակներով, դրսում գտնվողները ծռել են դրանք և հասցրել արանքներից հանել համածառայակիցներից Գարուշ Սարգսյանին և Ժիրայր Սահակյանին։ Մնացած 15 զինվորները կրակի մեջ են մնացել։
Թեև վաշտի հրամանատար Գոռ Մարգարյանը և ինժեներական ծառայության պետ Տիգրան Ղազարյանը դեպքի վայրում չեն եղել, նրանց փաստաբանը հրդեհից այրված կապիտան Հակոբյանին և օրապահ Լևոն Խառատյանին մեղադրում էր փախնելու և կրակը ժամանակին չհանգցնելու մեջ։ Մեղադրանքները հիմնվում էին անանուն վկաների ասածների վրա։
Դատական նիստի ավարտին կապիտան Հակոբյանը խոսք էր խնդրել, որ հերքի նախկին ծառայակիցների մեղադրանքները․ «Մտածում են՝ Եղիշը որ մենակ ա, իրա մեղքը որ ընդունում ա, գլուխը կախ կալանքի տակ ա, էն ա միանգամից բարդենք վրեն ամեն ինչը։ Չի կարելի էլի տենց»։ Դատի ժամանակ խոսվեց նաև զինվորական կացարանում թմրանյութերի և ալկոհոլի շրջանառության, ոչ կանոնադրական հարաբերությունների, վերադաս սպաների կողմից դիզվառելիքի ապօրինի վաճառքի մասին։
Տեսանյութը՝ ավելի քան 5 ժամ տևած նիստից։
Մանրամասները՝ epress.am/2024...
28 сен 2024