Այս 5 պարզ քայլերի միջոցով դուք վերջապես կկարողանաք անգլերեն սովորել
Քայլ առաջին
Անգլերեն պարապելուց առաջ նախ հստակեցրեք՝ ձեզ բրիտանակա՞ն, թե՞ ամերիկյան անգլերենն է պետք, ապա սկսեք պարապել։ Շատերը կասեն՝ դե անգլերենն անգլերեն է, էլի, ի՞նչ տարբերություն։ Տարբերություն կա ու դա հսկայական է։ Բրիտանական և ամերիկյան անգլերենի արտասանությունը նույնը չէ, դուք պետք է հստակ որոշեք՝ ձեզ ո՞րն է հարկավոր, և ըստ այդմ սկսեք աշխատել տվյալ տարբերակի արտասանության վրա։
Քայլ երկրորդ
Յուրաքանչյուր բառի արտասանությունը ստուգեք բառարանում, երբեք չմտածեք, թե դուք ամեն ինչ գիտեք և կարիք չկա ստուգելու։ Հավատացեք, ինչքան էլ լավ իմանաք, հաստատ մի հնչյուն սխալ եք արտասանելու և երբեք լեզվակրի նման չեք խոսելու։ Բայց միայն բառարանում ստուգելը բավարար չէ, կարևոր է նաև տրանսկրիպցիան նորմալ իմանալը։
Քայլ երրորդ
Մեզանից շատերը գնումների գնալիս ցուցակ են կազմում, եթե անգամ չունեք էլ նման սովորություն, ապա հենց այս պահից սկսեք ցուցակ կազմել և դա արեք անգլերենով։ Այո, սկզբից գուցե բարդ ու տարօրինակ թվա, մտածեք՝ բա որ տեղում մոռանա՞մ, թե որն ինչ է նշանակում, և այլն։ Ոչ, դա հրաշալի մեթոդ է, եթե նման մտավախություն ունեք, ապա նույն թղթի հետևում նույն հերթականությամբ գրեք նաև հայերեն տարբերակը, բայց անկեղծ եղեք ձեզ հետ ու դրանից օգտվեք միայն ծայրահեղ դեպքում։
Քայլ չորրորդ
Ամեն օր պարտադիր անգլերեն պարապեք․ թեկուզ 10 րոպե։ Անգլերենը պետք է դառնա ձեր առօրյայի մի մասը․ օրվա ընթացքում պարտադիր տեսանյութեր դիտեք, որևէ գիրք կարդացեք, սկզբի համար կարող է լինել մանկական գրականություն, փորձեք սոցցանցերում մեկնաբանություններ թողնել և այլն։ Դուք կարող եք ձեր սեփական նախասիրություններին համապատասխան դա կազմակերպել, բայց այնպես չլինի, որ մի օր 3 ժամ պարապեք ու մեկ շաբաթ ոչինչ չանեք։
Քայլ հինգերորդ
Մեզ ոչ դպրոցում, ոչ համալսարանում չեն սովորացնում այն կարևոր բառերը, որոնք գործածելով կարող ենք մոտ լինել լեզվակրի մակարդակին։ Գուցե իմանանք քերականություն, մի շարք ակադեմիական բառեր, բայց ամենակարևորն այն է, որ կենցաղային մակարդակում կարողանաք հաղորդակցվել և երբ մեկը ձեզ հարցնի, օրինակ՝ անգլերեն «ծորակ» ո՞նց կլինի, նորմալ պատասխանեք, ոչ թե սկսեք կմկմալ։ Դրա համար խորհուրդ եմ տալիս հենց այս պահին տան յուրաքանչյուր առարկայի անունը նայեք, արտասանությունն ստուգեք, գրեք կպչուն թղթի վրա՝ տրանսկրիպցիայով, և կպցնեք տվյալ առարկայի վրա։ Հավատացեք, լեզուն գերազանց սովորելու ճանապարհին դա հսկայական քայլ կլինի։
Follow me on Instagram: / razmikmartirosyan
Facebook: / martirosyan.raz
4 июн 2019
