Ով ինչ արժեքի դավանում է, այդպիսին էլ ինքն է. Բուն Բարեկենդան․ Բագրատ Սրբազան 

«Երբ մեղքը գործվում է, դա այնքան սարսափելի չէ, որքան այդ մեղքի մեջ մնալը։ Մարդու անկումն, այո, ողբերգություն է, բայց այդ ողբորգությանը դեմ հանդիման տրված է նաև վերականգնումը, որը հաղթանակ է և պայծառություն։
Սա է մեր կյանքի ամբողջ փիլիսոփայությունը՝ մնալը մեղքի մեջ՝ մեղքը մեղք է ծնում անընդհատ, սխալը սխալ է ծնում անընդհատ, սուտը սուտ է ծնում անընդհատ։
Եվ ի՞նչ է ասում այսօր մեր Տերը Բուն Բարեկենդանի այս օրը՝ ուր որ ձեր գանձերն են, այնտեղ էլ ձեր սրտերն են։ Ինչ որ ձեր դավանած արժեքներն են, որով դուք ապրում եք, այնտեղ էլ ձեր սիրտն է։ Իսկ ուր որ ձեր սիրտն է, այդպիսին էլ դուք եք։ Ուրիշ կերպ չեք կարող լինել, որքան էլ փորձեք ներկայացնել ու ներկայացնել, անհնար է դա։
․․․
Որքան ուզում ես ծոմ պահիր, որքան ուզում ես բարեպաշտական արտահայտություններ ունեցիր, ինչ ուզում ես արա։ Բայց եթե չքանդեցիր անիրավության հանգույցը և չխորտակեցիր քո վաճառականական խարդախությունն ու բռնությունը, չներեցիր ու չարձակեցիր նեղյալներին, չպատռեցիր բոլոր անիրավ մուրհակները՝ չես վաստակելու այդ ամենը՝ այդ հաղթանակն ու այդ ներդաշնակությունը, չես ստանալու այդ օրհնությունը։
Եվ դրա ակունքում, հիմքում անիրավության, անօրենության խզում է ուղղակի։
Պետք է կարողանաս խզել վաճառականական խարդախությունները, ուրիշ բան չի ասում։ Վաճառականական խարդախությունները․ ոչ թե վաճառականությունը, այլ՝ խարդախությունները, անիրավությունները, անօրենությունները, անհավասարությունները, սոցիալական և այլ անարդարությունները։
Սրանք հավաքականությանն են վերաբերում, ոչ միայն անձին ու անհատին։ Անշուշտ, այդտեղից է ծնվում հավաքականության կազմավորումը, ձևավորումը, բայց, այդուհանդերձ, բոլորի մասնակցությունն է, որ այդպիսին է դարձնում, ոչ թե մեկ կամ երկու հոգու» - Բագրատ արքեպիսկոպոս Գալստանյան (Տավուշեցի)
Իջևանի Սուրբ Ներսես Շնորհալի եկեղեցի
Բուն Բարեկենդան
19․02․2023
#Տավուշ #ՏաՀույս #ԲագրատՍրբազան