Արգանդի պարանոցի ծանր դիսպլազիայի դեպքում` կանանց մոտ հայտնաբերվել է պապիլոմա վիրուս. Մոտ 99 տոկոս: Այս մասին Aysor.am-ին հաղորդեց Հայ-ամերիկյան առողջության կենտրոնի գինեկոլոգիայի բաժանմունքի վարիչ Մարինա Ոսկանյանը և հավելեց, որ դիսպլազիայից քաղցկեղ մի քայլ է:
Նա նաև նշեց, որ պապիլոմա վիրուսի աճման միտում է նկատել, սակայն չկարողացավ ասել դա հետազոտության արդյունք է, թե իրոք աճ կա. գուցե այժմ կանայք ավելի շատ են դիմում իրենց առողջության խնդիրներով:
Հայաստանում հնարավոր է զրոյացնել արգանդի պարանոցի քաղցկեղից մահացությունը, եթե կանայք տարին մեկ անգամ հանձնեն պապ-քսուք, անգամ դրական պատասխանից հետո մասնագետները արգանդի պարանոցի վերին շերտից մաքրում են ախտահարված բջիջները, որից հետո կինը կարող է անգամ ինքնուրույն ծննդաբերել:
Մ. Ոսկանյանը նաև փոխանցեց, որ կանանց մոտ կարող է լինել պապիլոմա վիրուս, սակայն ոչ ակտիվ վիճակում և եթե կա վիրուսի զարգացման պայմաններ` անկանոն սեռական կյանք, դաշտանային ֆունկցիայի խանգարում, հորմոնալ դիսբալանս, ճարպակալում, ցածր սոցիալ-տնտեսական պայմաններ, վիրուսը կարող է գլուխ բարձրացնել` ախտահարելով պարանոցի բջիջները:
Մասնագետը նաև նշեց, որ պապիլոմա վիրուսի պատավաստանյութը` Ցերվարիքը, շատ եվրոպական երկրներում կիրառվում է, աղջիկներին պատվաստում են 9 տարեկանից սկսած:
Պատվաստումն, ըստ նրա, վնասակար չէ. պապիլոմա վիրուսի դեմ պատսվաստում են, ինչպես կարմրուկի կամ կարմրախտի դեմ և կինը ողջ կյանքում ապահովագրված է այդ վիրուսից, ինչպես նաև արգանդի պարանոցի քաղցկեղի հավանականությունից:
3 июн 2013
