أبو لهب العلاقات الزوجية 

أبو لهب العلاقات الزوجية
دكتور نفساني من الجاهلية
احجز جلستك في ترنداوي
الشائع على السوشيال ميديا دلوقتي إن أي حد عايز يوصل للناس بسرعة، يتكلم عن العلاقات
وده طبعًا، لأن معظمنا بيعاني من مشكلة حقيقية في إدارة علاقاته، سواء بأسرته أو أصدقاؤه، وخاصة بشريك الحياة
هنتكلم انهارده عن خبير ديناميكية العلاقات سامح بركات
هو وصف نفسه بكده، أيوه وكمان قال أنه لايف كوتش والناس بتحجز عنده جلسات في العيادة
ومع كل فيديو لسامح بيكتب بالبونط العريض "احجز جلستك"
سامح شاب من مدينة دمياط لابس دبلة وكاتب على صفحته أنه أعزب، وياريت يفضل كده على طول
مهو تبقى مصيبة لو بقى عندنا من سامح كتير
الكارثة أنهم أكيد بقوا كتير، مهو طول الفيديوهات بيتكلم عن اللي بيحجزوا عنده وعلى النصايح اللي بيقولها لهم
سامح اللي كلامه مفيش فيه ريحة التسامح، ونصايحه منزوع منها كل معاني البركة، بيتابعه ٣٥٠ ألف التيك توك و ١٢٤ ألف على الفيسبوك
ليه فيديوهات تخطت ال٥ مليون مشاهدة، وجاله أكتر من ٤ مليون إعجاب على فيديوهات اللي ممكن تبقى سبب في طلاق الشوية اللي لسه متطلقوش في البلد
سامح ساعات كتير بتهب منه ومبيعرفش يوصل المعلومة، زي فيديو عمله عن الأفلام الإباحية، تجاوز ال٥ مليون مشاهدة وجاله معظم التعليقات بتقول :
"نفهم من كلامك أننا لازم نعمل كده علشان منبقاش بنتفرج وبس.
وفي فيديو تاني ده بقى يرفع الضغط، بيتكلم فيه عن ماضي الست والراجل
وبيقول إن الماضي مفيد للراجل بس بيقلل من قيمة المرأة الجنسية في التزاوج
اللي هو يا سامح أنت لو بتتكلم عن بهيمة كنت هتنقي كلامك عن كده
وأحب أقولك بعيدًا عن الحرمانية زي ما أنت قلت إن الراجل كمان بيتأذي
كفاية أنه ممكن يتعقد من النساء وشكاك وعمره ما هيحس بلذة الحب اللي بجد بسبب الصفات اللي هيكتسبها من كتر الرمرمة
والعينة بينة
ومن المضحكات بردوا المرة اللي اتكلم فيها عن تصرفات إن حدثت اعرف أنه بيعمل وبيسوي
دخل الرجالة هنا وقالوا له: لا يا سامح إحنا بنخون ومش بنعمل اللي أنت بتقوله ده
وشهد شاهد من أهلها
سامح شايف إن الست محتاجها اللي يشكمها ويحكمها وميتهاونش معاها
مش عارفة أنهي ست بالضبط، بس أكيد اللي أنت وصفتها ب(مرة) في فيديوهاتك
اللي نعرفه عن الأخصائيين والأطباء النفسيين، أنه مينفعش يحكم على حد، ومينفعش يصنف حد
أنت بقى يا سامح كل فيديوهاتك قايمة على التوصيف والتصنيف، وكلها موجهة ضد المرأة
ووقت ما بتتزنق بتقول لا أنا بتكلم عن النسويات
يا سيدي نسويات ولا حتى نشويات
بردوا كلامك كله عنصرية وتجريح وهبد في الخلاط
العلاقات المتوازنة والطبيعية بتقوم على التفاهم والود وللرحمة مش على التصنيف والحكم على كل تصرف
أو زي ما بنقول أنك تقف على الواحدة أو تخترع أفكار لمجرد إن اللي قدامك عمل أي تصرف أو نطق لفظ تلقائي
اللي نعرفه بردوا يا سامح إن أجمل العلاقات هي اللي الشريك أيا كان مين هو أب ام أخ أخت حبيب أو زوج بيحبنا زي ما إحنا وبيخلينا نشوف نفسنا حلوين
العلاقات مينفعش حد يفتي فيها.. لأن كل كلمة ممكن تتسبب في خراب ملهوش آخر
وأي حد بيعمل ده بوعي أو من غير فهم مؤكد محتاج يحجز جلسته
إعداد
رحاب جمال
تقديم
رحاب جمال
مايكل جرجس
رينيه رأفت
تصميم بوستر الحلقة
مايكل جرجس
تصوير
شريف القاضي
مونتاج
حسام الدريني
تم التصوير
بإستديو قناة وطني
بجريدة وطني
مساعد مدير قناة وطني
ماجد سمير
مدير قناة وطني
شريف القاضي
تحت رعاية
مؤسسة وطني
للطباعة والنشر
رئيس مجلس الإدارة
يوسف سيدهم
ساعد في الإخراج
دميانه عادل
مساعد مخرج
ماجد مصري
إخراج
شريف القاضي