مرت سنتين ع انطلاق تجارب عبدالقادر بمطاعم الأردن و اليوم رح أحكيلكم عن أفضل مطاعم جربتهم خلال سنة بهالموسم و عملتلهم دروع تذكارية استحقوها ❤ رح أحكيلكم كل مطعم و شو اللي حسب تجربتي خلاه يستحق
Smokey Woods
كنت لما أنسأل شو ألذ مطعم جربته أقول ان هالسؤال عام و كل فئة فيها مطعم مميز، لحد ما جربت سموكي وودز في عبدون الشمالي و تغير جوابي و صرت أحكي انه ألذ مطعم جربته للآن.. الستيك، البريسكيت، الوينجز، كل شي بيشهي جدا.. و لازم ننوه ان أسعاره غالية عشان مستوى و طبيعة الأكل
DA JAJ
كونسبت جديد في شارع ممدوح الصرايرة خلف شارع مكة و طريقة تقديم مختلفة و الدجاج المشوي و تتبيلته رائعة شو ما اخترتو معها إضافات
مطعم أبو الخير Abu Al-khair Restaurant
عدا عن نظافة الكرش و الفوارغ، النخاع المطفى بالثوم و الليمون + الزغاليل المحشية فريكة، أصناف قمة عنده و لازم تجربوها في صالتهم الواسعة في الجبيهة
حلويات سلورة الشهباء
من زمان هم الأصل و معروفين بحلاوة الجبن بالقشطة البلدية لكن اكتسحو بقوة بالكيكة التركية (تريليتشيه) الألذ عندهم و مختلفة عن كل المحلات اللي بتعمل كيك و حليب و خلص، لأ عندهم الشغل الصح و بتشهي بقوة و فروعهم كثيرة أهمها وسط البلد طلوع الشابسوغ و خلدا و انتبهوا للاسم الكامل لوجود محلات ب أسماء مشابهة
مطعم الشامي
المبدع المختلف في الزرقاء، كريب الشاورما اختراع مميز و زاكي لكن كمان عندهم ألذ دجاج محشي رز بنجربه و كمان الخروف المحشي التواصي ممتاز عندهم
Shawerma Alkaram شاورما الكرم العربي
بالخبز العربي و جوا السندويشة بطاطا، هيك بحب و طعمه رائع و بالنسبة إلي هم الشاورما الأفضل حاليا و فروعه في الصويفية و شارع عبدالله غوشة و تجاربي كانت في فرع عبدون
Kubbeh Master
المشغل القوي المعتمد على التوصيل، عاملين اختراعات جديدة و تشكيلة مختلفة من الكبة باللحم البلدي، لكن الكبة اللبنية و الششبرك المطبوخين عندهم من ألذ الاشياء اللي جربناها بالبيت
Bollyfood indian restaurant مطعم بوليفود الهندي
المطعم الهندي في الهاشمي الشمالي، عدا عن تميزه بالأطباق الهندية خصوصا الكاري الحار و البرياني، عنده شاورما هندية قمة و لازم تجربوها، خذوها بأقل درجة حرورة اذا بتحبو الحار لأنها برضو حارة جدا و ممتعة و بتقدرو تطلبوها مش حارة
معجنات زوّار
مطعم جديد في اللويبدة و بينافس بقوة في عالم المعجنات شغله ممتاز و عنده ألذ رول مسخن بجربه، و جربو كمان رول الهوت دوج الحار و اقراص الزعتر و السبانخ الكبيرة
Mr.Fettuccine
متخصص المعكرونات في طبربور اللي شغله ولا غلطة، ولا صنف مش زاكي جدا، و ولا شكوى من المتابعين عليه إطلاقا الكل حبه و بيستحق.. جربو اللازانيا و البينا بيستو و جربو كل شي عنده اصلا لحد ما تختمو المينيو
---
الدروع الرائعة من صفحة حروف و أشكال Horoof Wa Ashkal ، متخصصة بالأعمال اليدوية و أبدعت بالأعمال بمادة الريزن
اختيار المطاعم كان بين ما يقارب 150 تجربة ، و منها مجموعة كبيرة كانت الأفضل و بيستحقو، حصرت العدد ب10 عشان تكون المنافسة قوية و محدودة و التكريم يكون لأفضل الأفضل.. ضروري أأكد ان التقييم هو شخصي حسب تجربتي ، الأذواق تتباين و المستويات ممكن تتغير لكن بتمنى الكل يكون تغيره للأفضل
من أروع الإنجازات من لما بدأت ، اني فزت بمتابعين راقيين مثلكم لدرجة ان المطاعم دايما بيقولولي الزباين اللي اجو من طرفك هم أرقى زباين.. بفتخر فيكم و جد بترفعو الراس الله يسعدكم شكرا إلكم كلكم، كل لايك و كل كلمة حلوة كانت جزء من السعادة اللي عشتها بسببكم و ان شا الله نظل نفيد و نستفيد جميعا ❤️
شكرا لكل حدا دعمني هالموسم، القائمة طويلة و كل حدا فيكم بيعرف مكانه في القلب و بتمنى كمان أكون ما قصرت معكم جميعا
أخوكم عبد القادر زين الدين
#تجارب_عبدالقادر
شكرا لمتابعتكم 🙏 لا تنسو تشغلو تنبيهات الصفحة عشان ما يروح عليكم اشي ✌️
على سنابي بنزل تفاصيل التجارب أول بأول
تابعوني على سناب شات و انستقرام و تيك توك : zeniddeen
و على صفحة فيس بوك : تجارب عبدالقادر
* أي أخطاء تصدر من أي مطعم أقوم بتجربته مسؤوليتها على المطعم نفسه، منشوراتي هي رأيي الشخصي عن تجربتي الشخصية فقط و لا أضمن إعجاب الجميع بأي مطعم
#food #foods #wheretoeat #wheretoeatjordan #explore #foryou #foodies #foodie #instafood #foodpic #foodpics #foodpictures #foodphotography #amman #jordan #jo #beamman #reels #lovejo #الأردن #عمان #أكل #تصوير #صور #مطعم #مطاعم #reel #تصويري #تصوير_الطعام
23 авг 2024