رضوان بن عبد السلام أول مرة عرفتو، عرفتو كشخص متبث مرة مرة كيدير لقطات وفسحة من المزحة ، شوية البسط وسط الدعوة إلى الله، فالبدايات ديالو منين كنتناقش مع شي واحد على طبيعة الأسلوب ديال رضوان ، كندافع عليه، وكنقول توما مالكم خليو عليكم السيد لم يرتكب محظورا على الأقل كيوصل رسائل وكاينصح الشباب، فديك الفترة كان الضحك ديالو خفيف ضريف مقبول ومامعيقش، وخرجو بعض الناس هاجموه أنذاك على أنه مخصوش يضحك كاع كنشوفهم أنهم زادو فيه، من بعد شوية بشوية باش ما غادي وهو كيتعرف ولادوز ديال الضحك غادي وكتزاد عندو، والضحك والبسالة غادي وكايكتسح مضمون كلامو.. أواه! تا ولى السيد فكاهي وكاينافس الكوميدين كاع ، مابقيت فاهم والو واش هذا هو رضوان لي كنت كنجي من جيهتو؟؟ وتا اليوتوب لي غير سيستيم صنفو، فمنين كتكتب أسماء الكوميدين كايطلع ليك سي رضون حداهم ، كتلف مكتبقى عارفو واش داعية ولا كوميدي؟؟ والمشكل الخطير فين كاين هو ان المتلقي #ولي_متبعو_باغي_يسمعو_باش_يضحك_ماشي_باش_يتعظ ! شفتي فين ولينا؟؟ المهم السيد حماض وتقلب من داعية إلى فكاهي، وهنا فين كايبان ليك أن الدعوة إلى الله خص يغلب عليها طابع الجد باش يتخاد دين الله بجدية، فكلما قلال الضحك فالدعوة إلى الله كلما كانت حلاوة ديك الفسحة القليلة من الضحك عندها طعم وجمالية ومعنى وسط الدعوة إلى الله، (وكنتفكر هنا أسلوب الأستاذ ياسين العمري) وكلما كثر الضحك كلما قلَّ وقع وأثر الكلام والنصيحة على القلب. مؤخرا شي شهر هاذي هرب فالنيفو فهادشي ديالو، عيق ديال بصح شفتو فواحد اللايف ديالو بالصدفة، كايدوي مع واحد الأخت من بعد ما قلبت شكون هاذي وعرفت أنها من مشاهير البوز المغربي كارديشان المغربية التائبة، بان ليا فرشخ الهيبة ديال أهل العلم وأهل القرآن وأهل الذكر وطلبة العلم فذاك اللايف، غي حاول تخيل معي وخا يصعب حتى تخيل الأمر، واش ممكن تخيل نفس الأمر مع الشيخ سعيد الكملي داير لايف مع درية وبارك عليها وتي متسوقيش لبنادم ضحكي ليا مع راسك، وعاطينها للضحك! وتخيل نفس الشيء مع الشيخ فريد الأنصاري رحمه الله، تخيل ابن القيم تخيل ابن تيمية تخيل تخيل.. وأنا غي مجرد نحط هاد أسماء العلماء الأحياء منهم والأموات فهاد السياق حشمان وخجول، نتمنى يسمحو ليا والله يسمح لينا منين ذكرناهم فهاد المثال، فخلي عليك نتخيلوهم فهاد الوضع؟! والأخت إلى تابت فعلا هي ولا غيرها خصها تريح الأرض وتمشي طلب العلم، وتغبر من كل ماهو متعلق بالويب والمواقع ولاسيما أنها كانت مخرمزاها فيه! تبتي جات عندك شوف تيفي غادي تقولي ليهم ، مامصوراش معكم أسي محمد، وغادي تجاوبيهم ب: هادشي بكل اختصار بيني وبين الله. ممكن ديري بوسط ولا شي حاجة بحال هاكا.. غي من باب باش تكون توبتك عبرة للغافلات هاذي نقبلوها، وغي تهناي الصحافة عندنا معندها مايدار البوسط ديالك غادي يشهروه، هادشي فحدود البوسط، ولكن باش تعلني توبتك وطلعي فالمواقع الإلكترونية وفاللايفات مع سي رضوان وربما مع غيرهم فلا! وأنت أسي الداعية الفكاهي رضوان آش دخلك أصلا فلي تاب أنت لست وصيا عليه، الأولى هو أن تشتغل بتصحيح أسلوبك فالدعوة أولا عاد دوي مع الناس، واش كاع لي صنعاتو موجة البوز المغربي ثم تاب تدوي معاه، حكا زعما بصفتك مؤثر فالويب وأنت لي فاهم فالدين وسط هاد المشاهير الحمقى ، فلك أن تتخيل ماقيمتك عند العقلاء والفضلاء عندما تصبح قدوة لدى الحمقى! أتكلم بصفة عامة لا أعني ولا أقصد أن هذه الأخت التائبة من الحمقى! لا ، ولكن طريقة إعلانها لتوبتها غير سليمة وغير صحية، ولا تخدم تدينها. التائب(ة) في نظري يجب أن يختلي بالله في أغلب الأوقات الأولى من توبته، حتى يتمكن ويترسخ في قلبه التقوى والإيمان والتباث. ومن بعد يبدى يختار أصدقاء صالحين لي يعاونوه على التمسك بدينه، ويلغي الصداقة مع لي مخدامش ليه.. وحاجة أخرى كسؤال واش أنت معني بنصح والحديث غي مع التائبين من البوز والتوندونس فقط؟ كتحطو راسكم فمواقف مقرفة وبايخة، اللايف خدام وباركين عليكم وتزوجو تواتيتو.. وعينك فيها.. حصلتي كنتي متبعها قبل التوبة..! لاش حطيتي راسك فهادشي لاش ؟! وعاطينها للضحك والبسالة، واش عادي تبقى تضاحكو فيما بينكم وبارك على درية عيشي الحياة وكتستدل ليها بآيات ليست في محلها. قاليك "وما أنزلنا عليك القرآن لتشقى" وأنت عاطيها لتكركير مع درية وهي تبادلك نفس الضحك (غادي نلوموك أنت بشكل كبيير ومغاديش نلوموها هي لأنها حديثة عهد بالتوبة) مكاين لا وقار لا حشمة لا الهبة ديال داعية، وبارك عليا "وماأنزلنا عليك القرآن لتشقى" واش من نيتك؟؟ وداير اللايف ربما من الدار وتقدر تكون حدى الأهل ديلك لي ربما كايشوفو هاد الخيلوطة والخرمزة بين الدعوة والفكاهة والميوعة واللا مروءة والمهانة والرضوخ! إلى ضرباتك النفس فعلا، وهاز الهم للأمة والشباب، وفرحتي بتوبة الأخت وبغيتي لي يكون بجنبها ويرافقها صيفط ليها ولا وصي عليها شي أخت صالحة تنصحها وتدوي معها فالخاص بلا لايف وبلا دوزيم، كاينين صفحات للدعوة مسيرينهم أخوات صالحات، كاين مركز يقين فيه أخوات ضابطين الأمور وربما أكثر منك علما كاع. يدويو مع البنت وسالينا، أما باش دير لينا هاد الستيل الدعوي الجديد ديال المرض مكاين لاش! ضرني خاطري ديال بصح لأن بهادشي كايموتو علينا الملاحدة بالضحك وكايطروليو علينا ، وكنشوهو راسنا ، الهبة ديال الدعاة وأهل العلم حاربتيها بهادشي لي درتي، أودي مابقينا فاهمين معكم والو؟! للإشارة أنا فقط دويت وعطيت رأيي فيما يقدمه رضوان بن عبد السلام كمؤثر وكشخصية عامة. الله يغفر لينا وليه. ______ هادشي مكتوب قبل ما تعلن ختنا فالله الإنتكاسة ديالها، وكنت حاس غي كتقلب على البوز، لأن لي تاب كيتكمش ماشي كيبقى يبان فجريدة هنا وجريدة لهيه ويطلع فاللايفات ولا سيما إلى كانت أنثى وعليها الأنظار..
