كلمات : أمل الطائر
ألحان : محمد إسماعيل محمد
1987
كلمات الأغنية :
يا قلبي سيبك يا قلبي ما دام الحباب بايعينك
ويفرطوا فيك وبأرخص الأثمان بايعينك
واللي إشترتهم زمان يا قلبي أنا دلوقتي بايعينك
لو كان معاك المال تلاقي الكل من حواليك
وإن خف مالك تلاقي الكل بايعينك
أنا زعلان زعلان من إيه
والنبي زعلان زعلان من إيه
وأنا برضه زعلان زعلان من إيه
زعلان من صاحبي اللي راعيته
وآمنته وكان البيت بيته
زعلان علشان فجأة لقيته
باع اللي بيننا بلحظة وخان
بتقولوا زعلان زعلان من إيه
وأنا برضه زعلان زعلان من إيه
زعلان على قلبي اللي بيحزن
زعلان وحزين جدا جدا
أنا مخلص أبا عن جدا
والغدر في قلبي مالهش مكان
بتقولوا زعلان زعلان من إيه
والنبي زعلان زعلان من إيه
زعلان علشان بختي المايل
زعلان وفي قلبي كتير شايل
وبعتت لأحبابي رسايل
بعتولي الرد بدون عنوان
بتقولوا زعلان زعلان من إيه
والنبي زعلان زعلان من إيه
زعلان من ناس كانوا غلابة
مشيوا ورا الدنيا الكذابة
فاكرينها يا ناس ملكن يابا
والأخ صبح بأخوه طمعان
وبتقولوا زعلان زعلان من إيه
وأنا برضه زعلان زعلان من إيه
زعلان من التوهة اللي أنا فيها
ودموعي بحاول أداريها
وحكايتي لمين بس أحكيها
أنا شفت عذاب أشكال وألوان
بتقولوا زعلان زعلان من إيه
والنبي زعلان زعلان من إيه
زعلان من ناس كانوا حبايبي
جرحوني يا ناس جرح في قلبي
وما حدش منهم كان جنبي
وفاتوني وحبي عليهم هان
بتقولوا زعلان زعلان من إيه
والنبي زعلان زعلان من إيه
وأنا برضه زعلان زعلان من إيه
15 сен 2024