ازاي النرجسي بيتلاعب بيكي ويخليكي تدمنيه..الجزء الأول ..التشافي (٦).. كوثر سند 

ازاي النرجسي بيتلاعب بيكي ويخليكي تدمنيه
دلوقتي فهمتي صفاتك اللي تسببت في تفاقم الازمة مع النرجسي واللي اصلا جذبت لك النرجسي
دلوقتي بقى حنفهم انتي بتعاني من ايه لما تكتشفي انك في علاقة مسيئة وعايزة توقف العلاقة دي سواء بالطلاق او بالانفصال النفسي مع استمرار الزواج
اللي بيحصل انك بتعاني من حاجتين الاتنين اسوأ من بعض
١- اول حاجة معاناة القهر والالم على الحب الخيالي اللي كنتي متخيلة وجوده بينك وبينه ، وفيه ناس بتاخد سنين طويلة عشان تصدق وتقتنع ان النرجسي مش بيحبها وعمره ماحبها وفيه ناس بتنهار نفسيا وبتعاني من اضطراب مابعد الصدمة ،
٢- تاني حاجة احساسك بالندم والعار والخزي لانك مش قادرة تفهمي انتي ازاي اتعمل فيكي كدة ، وازاي سمحتي له يعمل فيكي كدة وفوق كل دة كمان اللي حواليكي ونظرتهم لكي وكلام بعضهم انتي ازاي قبلتي الكلام دة وبعض المتفزلكين اللي يقولوا انا لو مكانك كنت تركته من اول اسبوع واشياد من هذا القبيل اللي تزود الشعور بالعار والخزي وتهدك بدل مايساعدوكي تجتازي الصدمة
وعشان تقدري تجتازي الحاجتين دول وتقف المعاناه دي لازم تفهمي انك مش انتي اللي فيكي مشكلة وانك مش غبية ابدا وان اذى الاذكياء ممكن يتعرض لتلاعب النرجسي وغيره من المستغلين وان اللي حصل لك دة كان حاجة زي ادمان المخدرات بالضبط وعشان كدة مش بتقدري تتخلصي من العلاقة بسهولة وممكن جدا تدمني الالم اللي بيسببه لكي النرجسي مش تدمني حبه والعلاقة الحميمة وبس ، وعشان تفهمي الكلام دة حصل ازاي ركزي معايا كويس في اللي حقوله : اللي بيحصل ان فيه كذا حاجة بتؤدي الى ادمانك للعلاقة المسيئة دي
اول حاجة الهرمونات اللي بيفرزها المخ ولخبطة التواصل بين مراكز التفكير والذاكرة والمشاعر في المخ
تاني حاجة شوية حاجات بيعملها المخ كنوع من الدفاع عن جسمك بتشتغل مع الهرمونات وتحكم سيطرة الادمان وحنبدأ بالدفاع اللي بيعمله المخ وبعدين نتكلم عن الهرمونات اللي بتعزز الدفاع دة
اول حاجة اسمها التنافر المعرفي : اللي هو ببساطة انتي واي حد فاهم ان الزوج مفروض بيكون الملاذ الامن للزوجة وكذلك الزوجة بتكون الملاذ الامن للزوج والمفروض ان الثقة بينهم ملهاش حدود وانهم بيحموا بعض وبيكملوا بعض وهو دة الطبيعي اللي مفروض يكون وخصوصا بقى ان النرجسي بيكون وهمك تماما انه بيحبك الحب اللي محدش حبهولك في حياتك وانه فارس الاحلام وانه حامي الحما ولكن مجرد مايبدأ مرحلة التحقير انتي بتحتاري وترتبكي والادرينالين يرتفع وجسمك يتعرض للامراض يقوم المخ اللي ربنا مبرمجه انه يحميكي يعمل ايه يعمل ميكانيزم دفاع اللي هو اسمه التنافر المعرفي دة اللي هو يقول لك لا هو مش قاصد يؤذيكي ، دة انتي اللي غلطتي ، جايز حاجة مزعلاة او مضغوط من الشغل او من اهله ، المهم انه يقنعك انك انتي ظالماه والراجل زي الفل ومفيش اي مشكلة ولا بيستغلك بوحشية ولا اي حاجة او ماهي كل الرجال كدة انتي بس اللي حساسة ، واللي بيساعد المخ على انه يظبط المسرحية الهزلية دي ان الاذى اللي بيعمله النرجسي بيكون ناعم وبطيء في الاول بحيث انك تقتنعي بالكلام اللي بيقوله مخك بسهولة وبينجح ميكانيزم الدفاع وبيخليكي تبدأي تتأقلمي مع الاذى اللي بيقع عليكي ……
وبعدين؟ ييجي بقى النرجسي ويعمل لك حاجة اسمها التعزيز المتقطع ، ايه التعزيز المتقطع دة؟
هو بيعمل ايه عادة معاكي؟ بيعاملك معاملة سيئة جدا معظم الوقت ، بس كدة؟ لا طبعا كان زمانك مشيتي وسيبتيه من زمان ، هو اذكى من كدة ، هو بيجي في اوقات او مناسبات وتلاقيه يديكي جوايز هزيلة ورخيصة زي جرعة حنان قليلة جدا ومعاملة كويسة لمدة قصيرة ممكن تكون مثلا قبل مايطلب منك طلب او قبل او اثناء العلاقة الحميمة زي ماشرحنا في حلقات العلاقة الحميمة اللي مسمعهاش يرجع يسمعها عشان يفهم النرجسي بيخليكي تدمني العلاقة الحميمة ازاي ، المهم الجوايز اللي بيديها لك من وقت للتاني دي بتخلي عندك
امل في رجوع مرحلة الاغواء تاني (اللي هي مرحلة الحب الدهبية) وطبعا تتمسكي بالعلاقة اكتر ، التعزيز المتقطع دة اللي بيعمله النرجسي بيشتغل مع المخ برضه ويسبب لك ترابط مسموم مع النرجسي ازاي؟ المخ فيه نظام اسمه نظام المكافئات او الجوايز ، النظام دة اللي احنا بنستخدمه في تربية اولادنا والمتخصصين النفسيين بيستخدموه في تعديل السلوك ، اللي هو ايه دة بقى ، اللي هو لما الطفل بيسمع كلامك بتقولي له برافو وكلمة برافو دي بتدي الطفل سعادة يعني مكافئة يقوم الطفل يرجع تاني يعمل نفس التصرف اللي اتقال عليه برافو او اي تصرف مشابه عشان يسمع كلمة برافو ، ايه اللي بيخلي الطفل يعمل كدة ؟ نظام المكافئات اللي في المخ ، طيب دة ايه علاقته بيكي انتي والنرجسي ؟
تابعونا على الفيس
اكونت الفيس بوك
www.facebook.c...
جروب ادرس عدوك النرجسي
/ kawthersanad11
قناة التلجرام
t.me/learnabou...
الكتب
١- Becoming the Narcissist's Nightmare
٢- Disarming the Narcissist
3- healing from narcissist