ازاي ترجعي احسن مما كنتي قبل ماتعرفي النرجسي
نسيت يعني ايه افرح واضحك او ابتسم
ليه بنوصل لكدة ؟
أسباب فيكي انتي بتخليكي كدة بغض النظر عن الحياة الصعبة اللي انتي عايشاها ، لكن انا مهتمة بيكي انتي مليش دعوة باللي حواليكي ولا بالظروف ، انا عايزاكي تكوني قوية وتوصلي انك تبقي انسان سوي ودة مش حيحصل لو فضلنا قاعدين في مكاننا نبكي على اللبن المسكوب ، عشان كدة حقول لك الأسباب اللي بتعطلك وتمنعك من انك تحسني حالك وتغيري وضعك ولو قدرتي تنفذي اللي حقوله لكي حتقدري تغيري وضعك وتتغيري وتعرفي تضحكي وتفرحي تاني
ايه اللي بيتحكم فيكي وفي تغيرك وليه مش بيسمح لك تكوني سعيدة ؟
عقلك !!! عقلك مش بيسمح لك تتغيري ولا بيسمح لك تكوني سعيدة ليه؟
١- عقلك كسول ومخلص لكي ، يعني ايه الكلام دة ؟ عقلك كسول يعني ايه يعني عقلك بيحب يحط شغله على الطيار الالي ، عارفين الطيار الالي كل الطيارات دلوقتي الطيار بيطلع بداية الطيران لحد ماتستقر الطيارة فوق وبعدين يحطها ع الطيار الالي برنامج بيسوق الطيارة وساعة النزول ينزلها الطيار اللي مش آلي ، المهم بقى عقلك بيعمل كدة بيظبطك ويبرمجك ويسيبك على كدة ومش كل شوية حيغير البرمجة لانها بتاخد مجهود وطاقة ، وطبعا من ضمن الحاجات اللي بتمشي كدة الهضم والدورة والدموية والتنفس ، بس كدة لاااا دا كمان المشاعر والاحاسيس الناتجة عن المواقف بتكون كدة ازاي يعني ؟ يعني الاسوياء لما حد يموت بيحزنوا صح؟ هل ممكن يغيروا دة هل ممكن يفرحوا؟ لا طبعا ليه؟ لانهم عقلهم مبرمجهم على كدة ، طيب لو كنا نقدر نعرف اللي مات راح الجنة ولا راح النار تفتكروا كنا حنحزن على كل اللي بيموتوا ولا على اللي راح النار بس ؟ واللي راح الجنة حنعمل له فرح ؟ القصد من الكلام ان حتى المشاعر متبرمجين عليها وردود افعالنا متبرمجين عليها عارفين ان حاجات معينة لما تحصل لازم نغضب وهكذا ، فلما عقلك يبرمجك ويحطك ع الطيار الالي عشان يوفر طاقة يبقي عقلك كسلان ومش عايز يهدر طاقة ويخليكي على وضعك الا اذا انتي وقفتي وقلتي لا لازم نعيد البرمجة وحقولك ازاي في الاخر
كمان عقلك مخلص لكي ازاي ؟ عقلك مخلص لكل اللي اتعلمتيه واكتسبتيه وبيتمسك بيه وبيدافع عنه حتى لو كان غلط ، عشان كدة بنقول ان عقلك بيدافع عن اللي بتعتقديه وبيحاول يثبت صحته حتى لو كان غلط ، يعني انتي صدقتي واقتنعتي ان حياتك مع النرجسي عمرها ما حتتحسن ولا عمرك حترتاحي ولا حتشوفي السعادة ولا حتى حتقدري تسيبيه ولا حتقدري تشتغلي ولا حتقدري تقنعيه او تفرضي عليه أي حاجة انتي عايزاها ، لو دة اقتناعك وعتقادك فعقلك حيفضل يدور على كل الأسباب والأدلة اللي تثبت انك صح ، ايه دة طيب نعمل ايه ؟
قبل ما أقول لك نعمل ايه حنبهك لنقطة مهمة جدا ، الاتجاهات عندنا دايما بتكون اما فوق او تحت ، اما يمين او شمال ، يعني ايه ؟ يعني لو انتير كنتي عربية على منحدر يعني ارض مايلة من غير ما ترفعي الفرامل حيحصل ايه ؟ العربية حتنزل ولا حتطلع؟ طبعا حتنزل أي حاجة لو مكناش نزقها لفوق حتقع فورا لتحت ، نفس الحكاية في تفكيرك حتزقي تفكيرك لفوق بالعلم والاطلاع حيطلع معاكي ، حتسيبيه في مكانه حينزل لازم حينزل لان كل يوم فيه جديد كل يوم معلومات واكتشافات جديدة واللي مش بياخد كل يوم معلومة بيصبح من اهل الكهف مش عارف ايه اللي بيحصل ، ولو مرفعتيش عقلك ووجهتيه في اتجاه الإيجابية حيروح فين حيروح ع السلبية لو مراحش يمين حيروح شمال مفيش غير كدة ،خدي بالك جدا من النقطة دي انتي لازم تزقي ولازم تعملي مجهود عشان تحركي عقلك وتشغليه مش هو اللي يشغلك
طيب حنعمل ايه في نفسنا ؟ حنبرمج عقلنا ع اللي احنا عايزينه مش حنسمح له يحطنا ع الطيار الالي ابدا
١- اول حاجة ماتتسرعيش في تصديق كل شيء تفكريه فيه يعني ايه ؟ يعني مش كل حاجة تحسي انها على هواكي تصدقيها لانك لو صدقتيها وهي غلط عقلك حيعززها ويدافع عنها زي ماقلت لك ، يبقى لازم افكر بقى في معتقداتي وقناعاتي وافنطها كدة واحدة واحدة واشوفها صح ولا غلط لان مفيش حاجة بتأخر البني ادم اكتر من قناعاته زي ايه يعني؟ مثلا انتي مقتنعة انك مستوى ذكائك ضعيف فعقلك حيحاول يجيب لك كل الأدلة على كدة ، بالرغم من انك ممكن تكوني ذكية جدا لكن النرجسي أيا كان ابوكب امك زوجك المهم انه اقنعك انك مش ذكية وانتي بدون ماتفكري في قناعتك دي قبلتيها وسلمتيها لعقلك يرسخها وميسمحلكيش تغيريها ، وهكذا .... ونفس الكلام تطبيقيه على افكارك زي ماقلنا في حلقة ازاي تكوني اقوى من النرجسي (١)
كمان لازم تتعلمي تتحكمي في الأفكار اللي تتوارد على عقلك ، يعني ايه يعني متسيبيش الأفكار تكون زحمة ف دماغك وتبقى شبه الموسيقى التصويرية اللي ملهاش أي فايدة في المشهد غير انها تزيد توتر المتفرج ، الأفكار الكتير اللي ملهاش لازمة بتوترك وتزود الضغط عليكي ، خليكي واعية ومدركة لافكارك زي ما اتفقنا واختاري تفكري في ايه وايه الأفكار اللي تطرديها من عقلك واكتر حاجة بتساعد على كدة الاسترخاء افتحي فيديوهات الاسترخاد واليوجا واسمعي منهم بيقولوا لازم تطردي الأفكار وتوقفي تفكير عشان تعرفي تسترخي صح ، بالتدريج وبالتعود حتقدري وحتعرفي تعملي دة ، لو انتي عايزة تبرمجي عقلك مش هو اللي يبرمجك . تفتكري بقي عقلك حيستسلم للكلام دة بسهولة؟ اكيد لا احنا لسة قايلين كسول ومخلص لكل اللي اتعلمتيه واعتقدتيه وغرستيه فيه طول الوقت فبالتالي حيقاوم ويقول لك لا كتير وحيحاول يكسلك ويقول لك ماحنا كدة كويسين اهي عيشة ادينا ماشيين بكرة القيامة تقوم بكرة نخلص من الدنيا والكلام السلبي اللي يوقفك وطبعا انتي اقوى من انك تستسلمي له انتي حتغيري مفاهيمه وحتقرأي ، انتي حتقاوميه وحتبرمجيه وحتحاولي مرة واتنين وثلاثة وعشرة وعشرين حتعيدي تعليمه من جديد . جربي واذا مااستفدتيش مش حتخسري ، بس انتي جربي ، جربي تشغلي مخك وتخليه يبطل كسل
جروب ادرس عدوك النرجسي
/ kawthersanad11
صفحتي الخاصة للتواصل معي
/ kawthersanad1.wordpress
25 авг 2024