ازاي تكسب مليون جنية بكل سهولة اسرار لا يعرفها غير الأغنياء  

ازاي تخلي الجنيه مليون جنيه، عمرك فكرت في إجابة السؤال ده .. وإنها ممكن تتحقق فعلا ولا ده مجرد كلام للتشجيع والتحفيز وقصص نجاح استثنائية لبعض الاشخاص اللي فعلا كانوا ولا حاجة ودلوقتي هما اثرياء العالم وبيتحكموا في اقتصاده .. قبل ما أجاوبك على السؤال ده في حلقة النهاردة .. لازم تعرف الأول ليه السؤال ده مهم وليه الإجابة عليه أهم بكتير..
السؤال ده مهم .. لأن الاوضاع الاقتصادية الحالية مش مستقرة .. وفي حاجة كدة في كل أسواق واقتصادات العالم مش بتسيب الفلوس بتاعة حضرتك او فلوس أي حد تاني تنمو أو على الاقل مش بتسيبها بنفس قيمتها .. والحاجة دي هي التضخم .. واللي عنده قدرة كبيرة إنه يدمر مدخراتك اللي فضلت تحوش فيها سنين.. وهنا تظهر اهمية السؤال اللي طرحناه من شوية لان ببساطة التضخم هو العدو الاول لأي مدخرات في حالة سايلة فلوس يعني .. وبالتالي تشغيل الفلوس هيوفر عليك خساير ببلاش بيفرضها عليك التضخم
لازم كمان في البداية تعرف إن الاستثمار الناجح بيتكلف وقت وجهد .. فلو حضرتك مستني او متخيل إن تحويل الجنيه لميلون جنيه عبارة عن ضربة من عصاية سحرية .. فاحب اقولك إن في خبرين واحد حلو والتاني وحش .. وخلينا نبدأ بالوحش .. وهو إن تحويل الجنيه لميلون على ارض الواقع الموضوع هيحتاج منك مجهود كبير شوية وإلا لو كان سهل كانت الناس كلها زمنها غنية دلوقتي .. طب والخبر الحلو.. الخبر حلو بقا إنك ممكن فعلا تحول الجنيه لميلون وده ليه طريقتين هقولك عليهم في حلقة النهاردة
(استراتيجيه الشراء والاحتفاظ )
في البداية هأكد على حضرتك تاني قبل ما اشرحلك الطريقتين لتحويل الجنيه لمليون جنيه .. لازم تعرف إن المبدأ ده يكون قدام عينك طول الوقت وهو إن الاستثمار الناجح زي ما قولتلك بيتكلف وقت وجهد .. اتفقنا
بالنسبة للطريقة الأولى لتحويل الجنيه لميلون جنيه .. ودي الطريقة اللي بيفضلها ورن بافت .. وده خامس أغنى شخص على وجهة الأرض واللي ثروته بتقدر بأكتر من 85 مليار دولار .. فهي طريقة او استراتيجية الشراء والاحتفاظ .. ودي استراتيجية متعلقة بالاستثمار في الأوراق المالية زي الأسهم والسندات .. وده معناه إن تشتري أسهم شركة ما وتفضل محتفظ بيها لفترة طويلة بغض النظر عن تقلبات السوق .. وبكدة الاستثمار بتاعك يكون بيحصل بمرور الوقت .. يعني اكنك هتشتري بمبلغ انت مش محتاجه وليكن مثلا 1000 جنيه أسهم شركة معينة وتنساه كام سنة كدة .. وهو المبلغ هيشغل نفسه بنفسه.
لكن السؤال دلوقتي هل الطريقة دي مجربة مضمونة يعني .. واللي بيرد على السؤال ده هو ورن بافت نفسه واللي كلمتك عنه من شوية.. وبيقول إنه في سنة 1919 .. بدأت شركة صغيرة للمياه الغازية اسمها كوكاكولا تطرح نفسها للاكتتاب العام .. بمعنى أنها هتطرح نفسها في البورصة . وفي الوقت ده كانت مخاطر الاستثمار فيها كبيرة لان أسعار السكر كانت مرتفعة والحرب العالمية لسه خالصة من سنة .. غير أزمة الكساد الكبير اللي حصلت بعدها بكام سنة ..
(البورصة والأرباح المضاعفة )
ورن بافت بيقول إن لو كان في حد استثمر في شركة كوكاكولا في الوقت ده بـ 40 دولار بس .. كانت حجم ثروته في 2012 هيبقى 11 مليون دولار.. يعني اضعاف مضاعفة ودلقوتي ممكن توصل لـأكتر من 100 مليون دولار .. ولكن ده انجح مثال .. خلينا مانخدوش كمقياس ولكن برده بيظل يدي مؤشر عن مدى الارباح اللي ممكن تتحقق من الاستثمار في البورصة
وفي مثال كمان .. عن الاستثمار في البورصة وسوق الأوراق المالية .. فلو كنت اشتريت واستثمرت في شركة اماوزن من حوالي 10 سنين .. فالمبلغ اللي استثمرت بيه كان هيتضاعف 20 مرة وأكتر من كدة كمان
ولكن يبقى السؤال الأول والاهم واللي اجابته هي اللي هتحدد إن كانت فلوسك هتسكب ولا هتخسر .. والسؤال ده هو ازاي نختار الاسهم اللي هتحقق لحضرتك أعلى عائد .. والاجابة على السؤال ده ممكن تلاقيها وتتابعها باستمرار من خلال متابعة التحليلات بتاعة الناس اللي بتفهم في البورصة وتاريخ اداء الشركاء واستشارة الشركات المتخصصة في التداول للاوراق المالية وتوصيات البنوك الاستثمارية .. ولو انت متابع فهتلاقي على الساحة مجموعة بنوك وشركات بتقولك أفضل أسهم خلال العام القادم مثلا وده بيكون بناء على تحليلات معينة بيعملوها
#خمسة_اقتصاد