ازاي نتعامل مع الام النرجسية
هنا حنتكلم عن الام اللي بتندرج تحت نرجسي ظاهر خبيث وثالوث ورباعي ،الناس اللي مش فاهمة دول ايه تكتب ع اليوتيوب ثالوث الظلام كوثر سند وكمان النرجسي الخبيث والنرجسي الانتقامي ، اسمعي الحلقات دي ولو لقيتي امك فيها الصفات دي اعرفي انها نرجسية خطيرة
اللي بيحصل ان النرجسي نرجسي أيا كان صلته بيكي ايه ، انا عارفة ان في حالة الام الموضوع بيكون صادم جدا ومؤلم جدا وفعلا لما بيكون الزوج نرجسي بتخلعيه لو جبتي اخرك وبعدين خلصت تقدري ماتشوفيهوش ابدا تاني في حياتك اما لو كانت امك ، حتى الاب بيكون اسهل شوية من الام في الصدمة لان المتوقع الحنان والحب والاحتواء من الام ، المفروض ان محدش بيحبك اد امك وفجأة تعرفي انها مش بتحبك وكمان بتستغلك وبتهدك وبتخوض في عرضك ، كل دة بيعمل لك صدمة اقوى من صدمتك في النرجسي ، خدي بالك انا بتكلم عن الام النرجسي الظاهر الخبيث لان مش كل الامهات النرجسيات بيعملوا كدة مش كل ام نرجسية بتخوض في عرض بنتها لكن مفيش ام تخوض في عرض بنتها متكونش نرجسية
كمان الام النرجسية للأسف بتغير من الابنة كبش الفدا حتى لو كانت البنت امكانياتها محدودة يعني الام ممكن تكون اجمل بكتير ومع ذلك بتغير من البنت اللي هي متوسطة الجمال بس لبقة ومتحدثة ، او حبيبة ابوها او اخواتها بيحبوها ، وفي الحالة دي الام بتسود عيشة بنتها ، وبتكون كل حياتها معاها انتقادات وتكسير وتقليل قيمة زي ما الزوج النرجسي بيعمل بالظبط دا غير الاستغلال في الخدمة يعني حالات بتقول انهم بيخدموا في بيت امهم زي الخادمات بالظبط قهرا وجبرا والام الجميلة لو بتروح الشغل بترجع بناتها يأكلوها بالرغم من انهم ممكن يكونوا بيدرسوا وعندهم مسئولياتهم او بيشتغلوا زيها لكن هي مجرد ماكبروا شيلتهم مسئوليتها كاملها وشالت هي ايدها وبعض الأمهات كمان بتعمل كدة حتى في أولادها الصبيان هي بتستخدمهم بدل ماتجيب شغالة تاخد من فلوسها بتستخدم أولادها بنات وصبيان في خدمتها وبعضهن دايما تقول لاولادها انا اللي جبتكم وانا السبب في وجودكم في الدنيا فلازم تردوا لي الجميل يعني فاضل تقول لهم لازم تعبدوني ، الام النرجسية والأب النرجسي ممكن يكونوا سعداء جدا ان زوجك نرجسي او بخيل عشان تفضلي محتاجة لهم وعشان ميكونش لكي غيرهم وتفضلي تاخدي منهم مصاريفك ، ولو حبيتي تخلصي منه وتشتغلي وتعيشي حياتك ممكن جدا يمنعوكي عشان تفضلي مذلولة له وبالتالي لهم وتفضلي تلجأي لهم .
الام النرجسية دايما تقارنك بالطفل الدهبي او باي طفل في العيلة لحد ما تكبري وتتجوزي وهي لسة بتقارنك برضه باي حد وبكل حد ، وعمرها ماتقف جنبك في أي محنة ولو جت وقفت جنبك في ولادة بيكون عشان الناس وعشان تبقى عملت عمل بطولي وتفضل تذلك بيه طول الوقت
انا ليه بقول لك هي بتعمل ايه ؟ عشان تفهمي لو امك بتعمل كدة تبقى انسانة غير سوية ومش مفروض تتعاملي معاها كشخص سوي وخدي بالك كمان من الكارثة الكبيرة ، انك ممكن جدا تكوني مدمانها ودة حيصعب عليكي الموضوع وممكن أصلا ميعجبكيش كلامي وتهاجميني وهي تصعب عليكي وخصوصا لو كبرت وضعفت ، المهم لو انتي مدمناها لازم تسمعي التشافي ولازم تقللي مقابلتك معاها حتى لو انتي عايشة معاها في نفس البيت
ازاي الكلام دة ؟
شوفي انا مش بقول لك قاطعي امك واقطعي الرحم وكل الكلام دة لكن حقول لك لو بعد الشر امك ذهب عقلها او بتسكر وبيذهب عقلها تفتكري ان ربنا حيكون عايز منك انك تفضلي عايشة معاها وهي ذاهب عقلها وممكن تدبحك وانتين ايمة ؟ ولا ربنا حيعاقبك عشان انتي القيتي بنفسك في التهلكة ببقائك معاها ؟
قيسي بقى هي اه ماذهبش عقلها لكن هي كل تصرفاتها مؤذية لكي ، وانا مش بقول لك ابدا اهجريها تماما وابعدي عنها واقطعيها لا انا بس بقول لك ابعدي شوية يعني خلي لقائكم مرة كل أسبوعين او مرة كل شهر واذا انتي اتطلقتي وعايشة معاها بأولادك موتي نفسك في الشغل عشان تخرجي من بيتها وتأجري لنفسك مكان واولادك حيكبروا وحيبقوا ونسك اما لو فضلتي معاها فاولادك حيكبروا ويبقوا نرجسيين ، تأثيرها على اولادك حيكون زي تأثير ابوهم عليهم واللي انتي سيبتيه عشان تهربي بيهم وعشان تحميهم منه وعشان ميطلعوش نرجسيين بسببه وسبب تربيته فتهربي منه وترميهم للي زيه ، واذا انتي أصلا لسة ماتجوزتيش خلي معاملتك معاها مش اكتر من معاملة الجارة يعني متعرفيهاش حاجة عنك ولا نجاحاتك ولا اخفاقاتك وماتديهاش فرصة تتدخل في حياتك وخلي الكلام معاها سطحي جدا واذا هي صحيا محتاجة الخدمة اخدميها لوجه الله اما لو هي تمام وبتستغلك ماتطوعيهاش ومتخافيش منها مهما دعت عليكي وهي ظالمة ربنا مش حيستجيب اكيد للظالم ، اذا هي صحيا تمام ساعديها في شغل البيت لكن ماتشيليش مسئوليتها كاملة واذا هي عندها مصدر رزق او بتشتغل زيك ع الأقل ادفعي مصاريفك وهي تدفع مصاريفها ، لان فيه حالات هي اللي بتصرف على امهاتها وهم الاتنين بيشتغلوا والام معاها والمفروض البنت تجهز نفسها وتجوز نفسها وتصرف على البيت وامها مش بتشارك بأي شيء يعني زي استغلال الزوج النرجسي بالظبط ، وساعة الجواز مثلا تلاقيها ممكن ماتديهاش أصلا ميراثها من ابوها عشان تتجوز بيه يبقى تصرف على نفسها وانتي اصرفي على نفسك ،حتغضب وتثور وتدعي عليكي ، ولا تهتمي ،خايفة اتصلي بدار الفتوى واحكي لهم اللي هي بتعمله بالتفصيل شوفي حيقولوا لك ايه ، في النهاية عايزة أقول لك ان الام النرجسية ممكن تكون أسوأ من الزوج لدرجة ان بعض الحالات بتقول لا نار النرجسي ولا جنة امي وطبعا لانها نرجسية اقوى واذاها اكبر وخصوصا لو هي ظاهرة والزوج خفي .
شوفي موضوع الحرمانية في الام النرجسية فكري فيه بعقلك ، لو انتي بتتئذي وبيتخاض في عرضك وبيتعمل لك تشويه سمعة في العيلة والشارع وعند الجيران و بتستخدمك وتستغلك وتاخد فلوسك كمان وممكن تمنع ابوكي انه يساعدك تبقى بتؤذيكي اد ايه ، ولما تكسرك وتجيب لك امراض نفسية وجسدية تبقى بتؤذيكي ولا لا ، ويوم القيامة مش ربنا حيسألك عن نفسك وحيسألك حافظتي على جسمك وعمرك ومالك حتقولي له ايه امي حيقولك لك مابعدتيش عنها وصاحبتيها في الدنيا معروفا
5 сен 2024