اكبر غلطة تغلطتيها مع النرجسي انك تدعمي النرجسي ماديا ****** ٦
طول عمرنا فاهمين ومتربيين على ان مينفعش الراجل ياخد فلوس من ست أيا كانت هي مين بالنسبة له لا اخته ولا زوجته ولا خطيبته ولا صديقته ولا زميلته
وفجأة مفاهيم التربية اتغيرت وبقت عادي الزوجة تشارك في البيت طالما بتنزل وبتشتغل ، وقلنا ماشي تساعد ونتشارك المسئولية على أساس ان هو كمان بيساعدها في البيت والتربية ومذاكرة الأولاد وبالتراضي ، اما اللي بيحصل بقى مع النرجسي فبيكون شيء فج ومبالغ فيه ومع ذلك انتي مش بتاخدي بالك منه
زمان اتخطبت صاحبتي وفي يوم جت تقول لي مش حيقدر يجيب شبكة ،قلت مش اشكال خالص المهم يكون انسان كويس ، شوية ولقيتها بتقول لي حجيب انا الشبكة عشان الشكل العام وكدة ، قلت لها هو موافق على كدة قالت دة اقتراحه ،قلت لها خدي بالك دة مؤشر مش حلو ، طبعا معجبهاش الكلام ، وبدأت متحكيش تاني ، في يوم قلت لها اوعي تديه مرتبك اوعي تملكيه عرقك شاركي بس مش بكل اللي عندك ، قالت لي ايه لا دة غلبان وانا حساعده ، سكتت تماما واتجوزته وبعد سنين من الصمت اتطلقت وعرفت منها انه كان بينام وميروحش الشغل وهو معاه كمان حرفة وعنده ورشة يعني مش مرتب الوظيفة وبس ، لكن ساب كل دة وريح نفسه ونام عشان هي اللي كانت بتصرف عليه وعلى أولاده من زوجته الاولانية وكان بياخد مرتبها ويديها فلوس تكفي المواصلات بالعافية ولا فطار ولا مصروف ايد ولا احتياجات ولا أي شيء ، ، شوفي هو كان باين من الأول بس هي معرفتش ومكانتش عايزة تعرف ليه لانها كانت في مرحلة الحب الدهبية ورفضت تسمع غير كلامه وواضح ان هو عرف يبعدها عني وعن كل الناس لكن في النهاية ربنا بيحلها وبيستر وكل شيء وله اخر ، دي مشكلتها كانت اسهل من غيرها كتير لانها بتشتغل ومعندهاش أطفال ، لكن اللي مش بتشتغل وعندها أولاد وجت في مرحلة الحب الدهبية وباعت شبكتها عشان نكمل البيت ونجيب دة ونجيب دة واللي في مراحل الهورينج باعت بقيت دهبها اللي أهلها جايبينهلها واللي كمان ورثت وراح سندها وظهرها اللي هو ابوها ولما ساب له ورث يسند معاها اتعمل لها هوفرينج واتاخد ميراثها ،والمصيبة ان فيه ناس بيتاخد ميراثها من غير هوفرينج ، بيتاخد بالاجبار والتهديد والمعاملة الوحشة ، ليه عشان خايفة يسيبها وخايفة من النكد والبعض بيخافوا من الضرب ، عايزة أقول لك طول مانتي خايفة طول ما انتي حيتعمل فيكي اكتر من كدة بكتير ، عارفة ليه عشان انتين سيتي ربنا فلما نسيتيه نسيتي ان فيه حد قوي قادر يجيب لك حقك ونسيتي ان فيه حد عادل مش بيضيع حق حد ونسيتي انه مبيحبش المؤمن يكون ضعيف ومستهان به ومستباح ارضه ونفسه وروحه ، اكيد ربنا مش بيحب النوع دة من المسلمين اللي مش بيحاولوا حتى يستعينوا بيه ويثقوا فيه ، افهمي ربنا صح عشان تعرفي انتي مين وراكي ومين في ظهرك ومين اللي في صفك تقومي تبقي قوية بيه ومتخافيش ومتتنازليش عن حقوقك وعن ورثك وعن دهبك وعن تعبك وشقاكي طول الشهر وهو ياخد مرتبك ومايديكيش حتى مصروف .
علموا بناتكم واولادكم تاني ان الراجل مينفعش تصرف عليه واحدة ست عشان نقضي على الجيل المتخلف اللي ابتلينا بيه دة
علموا بناتكم انها لما تخرج مع خطيبها ويقول لها نسيت المحفظة ادفعي انتي وميرجعلهاش اللي دفعته تفهم انه مش راجل ، علموهم ان اللي ياخد منها تمن الشبكة عشان تستره ادام الناس يبقى مش راجل مرتين مرة عشان خاف من كلام الناس في حاجة متخصش الناس ومرة عشان قبل ياخد منها فلوس ، علموا بناتكم ان اللي يخطبها ويسألها عن مرتبها بتاخد كام تعرف انه مش راجل ، واللي يقول لها حنشيل بالنص من غير أصلا مايكون لا خلف ولا ودى مدارس يعني بيقول لها انتي حتأكلي نفسك وانا مش حصرف عليكي وبالتالي مليش عليكي قوامة يعني هو بيقول لها انا مش راجل ، ولو حتى كان بيجيب لها هدايا الماس دة ملوش دعوة بدة ، دة رسم وتمثيل وحياخد اللي جابه كله مع اول خناقة ، اكيد كلكم بتشوفوا اللي بياخد دهب مراته ويخبيه عند اخهله او في الخزنة ويقفل عليه
انتبهي لنفسك مفيش راجل بيقبل فلوس من ست ولا بيستلف منها باستثناء اللي بيديها من غير حساب وبيصرف عليها وكريم واتزنق لو موقفتش جنبه تبقى ندلة لكن انا بتكلم عن اللي داخل ياخد وبس من اول يوم
25 авг 2024