مِنْ مَلِكِ اَلْمُلُوكِ شَرْقًا وَغَرْبًا . . اَلْخَاقَانُ اَلْأَعْظَمُ . . يَعْلَمَ اَلْمَلِكْ اَلْمُظَفَّرْ قُطُزْ وَسَائِرَ أُمَرَاءِ ِالدِّيَارِ اَلْمِصْرِيَّةِ. . إِنَّا نَحْنُ جُنْدُ اَللَّهِ فِي أَرْضِهِ . . خَلَقَنَا مِنْ سُخْطِهِ . . وَسَلَّطَنَا عَلَى مَنْ حَلِّ بِهِ غَضَبُهُ . . فَلَكُمْ بِجَمِيعِ اَلْبِلَادِ مُعْتَبَرٌ . . وَعَنْ عَزْمِنَا مُذَدْجَرْ . . فَاتَّعَظُوا بِغَيْرِكُمْ وَأَسْلَمُوا لَنَا أَمْرِكُمْ.. فَنَحْنُ مَا نَرْحَمُ مِنْ بَكَى . . وَلَا نَرِقُّ لَمِنْ اِشْتَكَى . .
دى كانت رسالة هولاكو زعيم التتار.. للأمير سيف الدين قطز سلطان مصر وقتها.. واللى طالبه فيها بإنه يسلم مصر من بابها للتتار.. وإلا هيبيد مصر زى ما أباد بلاد كتير غيرها.. وهنا سؤال مهم.. قطز عمل ايه؟.. وازاى هزم جيش التتار الذى احتل نص كوكب الأرض؟.. وهل اللى شوفناه فى فيلم وا اسلاماه حقيقة ولا لأ؟.. وليه بيبرس قتل قطز؟.. وازاى قطز هذا الملك العظيم اللى انتصر على التتار يتقتل بالسهولة دى.. لأ ويتولى حكم مصر من بعده نفس الشخص اللى قتله عادى ولا كأنه عمل حاجه؟.. وازاى التتار قدروا يغزوا تقريبا نص خريطة العالم.. ويغزوا أهم الدول الاسلامية قبل ما يوصلوا مصر؟.. وليه الحكام المسلمين فى الوقت ده كانوا بيخونوا بعض لصالح التتار اللى مبيعملوش حاجه غير انهم بيحتلوا بلادهم ويقتلوا شعوبهم ويسرقوا ممتلكاتهم؟.. تفاصيل كتيرة وغريبة صعب كنت تصدقها لولا انها اتحكت فى كتب التاريخ.. ايه اللى حصل وليه؟.. هقولك..
سيدى المواطن.. أهلا بك فى القرن السابع الهجرى.. فى الوقت ده كانت حدود الدولة الإسلامية بتبدأ من غرب الصين وتاخد فى طريقها كده اسيا وافريقيا وتنتهى فى غرب أوروبا.. مفيش هيبه بعد كده.. لكن ده كان الظاهر.. أما الباطن فكان عبارة عن مجموعة حكام عمالين يقطعوا فى بعض.. فمثلا عندك مصر والشام والحجاز واليمن كانت فى ايد الأيوبيين.. أما من شرق ليبيا لغرب المغرب.. ومن الأندلس فى الشمال لوسط افريقيا فى الجنوب.. فكانت تحت ايد دولة الموحدين.. وأخيرا الدولة الخوارزمية اللى كانت بتضم معظم البلاد الإسلامية فى قارة اسيا.. ودى امتدت حدودها من غرب الصين لحد غرب إيران..
طيب دى كانت القوة الإسلامية فى العالم وقتها.. هل كان فى قوى تانية؟.. طبعا كان فى.. عندك الصليبيين.. وكانوا متمركزين فى غرب أوروبا.. ومكنش وراهم حاجه غير انهم يرتبوا حملات عسكرية علشان يهاجموا المسلمين.. كان مثلا ملوك انجلترا وفرنسا وألمانيا وإيطاليا كل شوية يطلعوا بحملة على الشام ومصر.. أما ملوك أسبانيا والبرتغال ومعاهم برده فرنسا.. يهاجموا المسلمين فى الأندلس..
لكن وبرغم خطورة الحروب فى الطرفين.. المسلمين والصليبيين.. إلا إن الناس كانوا خلاص اتعودوا على الموضوع.. وبقى العالم كله مورهوش حاجه غير خناقات المسلمين والصليبيين.. لكن فجأة.. تحصل حاجه مكنتش تخطر على بال حد.. تظهر قوة جديدة على كوكب الأرض.. تعجز كتب التاريخ عن وصف جرايمها ووحشيتها.. القوة دى اسمها التتار.. ظهرت دولة التتار سنة 603 ه.. أو 1206 ميلادية.. أول ما ظهرت ظهرت فى منغوليا شمال الصين.. وأول زعيم للتتار كان اسمه جنكيز خان..
التتار كان فيهم ميزة وعيب.. الميزة هى نظامهم العسكرى.. نظام محكم جدا.. أعداد رهيبة من البشر.. كانوا كتير.. جنودهم كانوا بيتحملوا الظروف القاسية لأبعد درجة.. عندهم سرعة انتشار رهيبة فى المعركة.. القيادات العسكرية فى جيوشهم كانوا على أعلى درجة من التخطيط والتكتيك العسكرى.. لكن عيبهم انهم كانوا معدومى الرحمة.. كانوا يدخلوا القرية أو المدينة يقتلوا الرجال.. ويأسروا النساء.. ويحرقوا البيوت.. فالمدينة اللى كانت مليانه بشر وحياه قبل ما يدخلوها.. تتحول فى لمح البصر لشوية تراب بمجرد ما يخرجوا منها.. خلاص المدينة دى شكرا كده تختفى من الوجود..
الأخطر من كده ان مكنلهمش عهد.. يعنى انت كحاكم مدينة مثلا استخبيت فى مدينتك وقفلت أبوابها عليك علشان تحمى نفسك من التتار.. يقوموا يبعتولك رسول يوعدك بإنك لو فتحت أبواب المدينة وسلمتها بدون أى مقاومة.. فانت وشعبك آمنين.. لكن بمجرد ما تصدقهم وتفتح أبواب المدينة وجيوشهم تدخل.. بيكون مصيرك الموت وبلدك بتتسرق وتتحرق زى ما حكينا من شوية.. وللأسف حكام مسلمين كتير وقعوا فى الفخ ده.. مش بس كده.. ده فى حكام مسلمين راحوا بنفسهم يطلبوا دعم التتار فى الهجوم على حكام مسلمين تانيين.. زى ما هحكيلك كمان شوية.. اللى هو ذكاء محدود وعدى كل الحدود..
وأبسط مثال على خيانة التتار لعهودهم.. هو خيانتهم لعهدهم مع حاكم الدولة الخوارزمية اللى اتكلمنا عنها من شوية.. الملك محمد بن خوارزم شاه.. كان بينه وبين جنكيز خان معاهدة حسن جوار.. بما إن البلدين جنب بعض.. فعملوا معاهدة حسن جوار.. لكن جنكيز خان شاف انه علشان يغزو الدولة الإسلامية ككل.. لازم يبدأ بجاره.. ملك الدولة الخوارزمية.. طيب والمعاهدة اللى بينا وبينك يا جنكيز خان.. قالك مفيش الكلام ده.. وفعلا نفذ هجوم كبير جدا على الدولة الخوارزمية.. لكن الملك محمد بن خوارزم شاه.. قدر يتحرك بسرعة ويقابل جيش التتار.. واستمرت الحرب 4 أيام كاملين.. خسر جيش الدولة الخوارزمية فى المعركة دى 20 ألف مقاتل..
طيب والتتار خسروا كام؟.. تقريبا برده نفس العدد.. لكن زى ما قولتلك من شوية ان جيش التتار كان ضخم جدا.. أعدادهم رهيبه.. فمفرقش معاهم خسارة الـ 20 ألف.. والملك محمد بن خوارزم شاه كان مدرك لقوة جيش التتار.. علشان كده انسحب بجيشه داخل حدود دولته علشان يعيد ترتيب الجيش.. لكن غلط غلطه واحده.. وصحيح كانت غلطه واحده.. لكن جنكيز خان مكنش محتاج أكتر من الغلطة دى..
من المصادر
كتاب رسائل غيرت التاريخ
#المواطن_سعيد #التتار #سيف_الدين_قطز
28 авг 2024